Edinson Cavani ជាចំណែករកបានមួយគ្រាប់ ជួយឲ្យក្លឹប Manchester United យកឈ្នះទៅលើ Everton និងឆ្ពោះទៅកាន់វគ្គ ៤ ក្រុមចុងក្រោយ ព្រឹត្តិការណ៍ Carabao Cup។
ប៉ុន្តែក្រៅពីការស៊ុតបញ្ចូលទី ខ្សែប្រយុទ្ធសញ្ជាតិអ៊ុយរុយហ្គាយក៏ត្រូវបានគេប្រទះឃើញថាមានការបង្កកំហុសធ្ងន់ធ្ងរមួយទៅលើខ្សែការពារ Yerry Mina របស់ក្លឹប Everton ផងដែរ។ ប៉ុន្តែរឿងហួសចិត្ត Cavani មិនទទួលបានការពិន័យអ្វីទាំងអស់ នោះក៏ដោយសារតែអាជ្ញាកណ្ដាលមើលមិនឃើញ ហើយគាប់ជួននៅ Carabao Cup គ្មានប្រព័ន្ធ VAR ថែមទៀត។
នោះគឺកើតឡើងនៅកំឡុងនាទី ៥០ ដោយ Cavani បានយកដៃទៅច្របាច់ត្រង់ផ្នែកបំពង់ករបស់ Mina ឲ្យគេដួលទៅនឹងដី។ ការបង្កកំហុសបែបនេះ ត្រូវបានអ្នកគាំទ្រមួយចំនួនបញ្ចេញមតិលើបណ្តាញសង្គមថា Cavani ប្រើស្ទាយរបស់ស្តេចខ្មោចលើសង្វៀន WWE “The Undertaker”។
ទស្សនាវីដេអូខាងក្រោម៖
យ៉ាងណាមិញអាជ្ញាកណ្តាលលោក Andrew Madley មិនបានប្រទះឃើញសកម្មភាពពេលនោះឡើយ។ មួយផ្សេងទៀតដោយគ្មាន VAR ត្រួតពិនិត្យដូចនៅ Premier League ក៏នាំឲ្យការបង្កកំហុសនោះ ឆ្លងផុតការពិន័យអ្វីទាំងអស់។ ចុះអ្នករាល់គ្នាវិញ តើយល់ឃើញបែបណាពាក់ព័ន្ធនឹងរឿងនេះ?
ប្រភព៖ SportBible