អតីតជើងចាស់នៅក្លឹប Barcelona គឺលោក Rivaldo បានបង្ហាញការយល់ឃើញថា ប្រសិនកាលនៅជាកីឡាករលោកមានឱកាសរួមក្លឹបតែមួយជាមួយ Ronaldo Nazario នោះ គឺគ្មានប្រព័ន្ធការពារក្រុមណាអាចទប់ទល់ពួកលោកបានងាយៗឡើយ។
បញ្ជាក់ថា Rivaldo ជាអតីតខ្សែប្រយុទ្ធរបស់ Barcelona កំឡុងរដូវកាល ១៩៩៧ ដល់ ២០០២ ដោយរកបាន ១២៩ គ្រាប់និង Assist ៤១ លើកនៅ ២៣៥ ប្រកួតសរុប។
ប្រាប់សារព័ត៌មាន Betfair លោក Rivaldo និយាយ៖ “ប្រសិនខ្ញុំបានចាប់ដៃគូជាមួយ Ronaldo នៅ Real Madrid នោះពួកយើងនឹងក្លាយជាដៃគូដ៏គួរឲ្យខ្លាចមួយ ព្រោះយើងបានបង្ហាញពេលលេងឲ្យជម្រើសជាតិប្រេស៊ីលហើយ”។
លោកសង្កត់ធ្ងន់៖ “ការដែលយើងកាន់តែបានលេងជាមួយគ្នា ហើយនៅកម្រិតក្លឹបទៀតនោះ ប្រាកដជាកាន់តែអស្ចារ្យ ហើយប្រព័ន្ធការពារក្រុមដទៃនឹងខ្លាចរអាយើង មិនថាតែយើងស្ថិតក្នុងការលេងឲ្យក្រុមណានោះទេ ដោយនៅរដូវក្តៅ [ឆ្នាំ ២០០២] Ronaldo បានចុះហត្ថលេខាឲ្យ Real Madrid ហើយប្រសិនពេលនោះយើងបានទៅលេងរួមគ្នា គឺប្រាកដជាល្អខ្លាំង”៕
ប្រភព៖ Marca