លោក Frank Lampard អ្នកចាត់ការក្រុម Chelsea អះអាងថាលោកមិនបារម្ភឡើយចំពោះការមិនអាចរកគ្រាប់បាល់បានរបស់ Timo Werner នៅប៉ុន្មានប្រកួតមកនេះ។
ខ្សែប្រយុទ្ធវ័យ២៤ឆ្នាំបានមកដល់ Stamford Bridge កាលពីរដូវក្ដៅកន្លងទៅ ជាមួយតម្លៃខ្លួន៥៣លានផោន។ យ៉ាងណាមិញ កីឡាករអាល្លឺម៉ង់ខាងលើនេះនៅមិនទាន់បង្ហាញសមត្ថភាពល្អនៅឡើយទេ ដោយទើបរកបាន៤គ្រាប់ប៉ុណ្ណោះក្នុងការលេង១៤ប្រកួតនៅ Premier League ពោលគឺមិនដល់កម្រិតនៃការរំពឹងទុកឡើយ។
បើទោះជាយ៉ាងនេះក្ដី លោក Lampard អ្នកចាត់ការក្រុមបាននិយាយថា៖ “ខ្ញុំមិនបារម្ភចំពោះគាត់ឡើយ។ គ្រប់ខ្សែប្រយុទ្ធទាំងអស់សុទ្ធតែត្រូវការគ្រាប់បាល់ វាជារឿងធម្មតាក្នុងតំណែងនេះ។ តែសម្រាប់គាត់ ខ្ញុំយល់ថាគាត់ធ្វើបានល្អហើយប្រកួតកន្លងមកទោះមិនអាចរកបានគ្រាប់បាល់ក៏ដោយ។ ខ្ញុំជឿថានៅពេលខាងមុខ គាត់នឹងរកគ្រាប់បាល់បានច្រើនមិនខាន”៕
ប្រភព៖ DailyMail