កីឡាករ Lionel Messi ទើបតែប្រកាសក្លាយជាអ្នកឈ្នះពានរង្វាន់ Pichichi Trophy កាលពីពេលថ្មីៗនេះ ដែលវាជាលើកទី ៧ សម្រាប់លោកហើយ។ នេះជាពានដែលប្រគល់ជូនសម្រាប់កីឡាកររកបានគ្រាប់បាល់ច្រើនដាច់គេប្រចាំឆ្នាំនៅលីគកំពូលអេស្ប៉ាញ។
សួរនាំថា Messi ចង់បានពាននោះលើកទី ៨ ឬអត់ លោកបានឆ្លើយយ៉ាងច្បាស់ថា បើអាចសូមប្តូរទៅជាពាន La Liga ជាលក្ខណៈរួមជាមួយ Barcelona វិញ ព្រោះលោកមិនផ្តោតខ្លាំងលើពាន Pichichi ឡើយ។
ប្រាប់សារព័ត៌មាន Marca ខ្សែប្រយុទ្ធសញ្ជាតិអាហ្សង់ទីននិយាយ៖ “ពាន Pichichi លើកទី ៨? ខ្ញុំមិនដឹងទេឬអាចថាខ្ញុំមិនគិតអំពីវា ព្រោះវាមិនជាអ្វីដែលខ្ញុំផ្តោតសំខាន់ទេ ដោយខ្ញុំចង់ឈ្នះពាន La Liga ច្រើនជាង ហើយពួកយើងកំពុងតែខិតខំដើម្បីទៅដល់ចំណុចនោះហើយ”។
លោកបន្ថែម៖ “យើងមានការអភិវឌ្ឍរាងយឺតយ៉ាវបន្តិច ហើយជួបបញ្ហាមួយចំនួននៅការប្រកួតក្នុងលីគ ឬពេលខ្លះយើងមិនសមនឹងត្រូវបាត់បង់ពិន្ទុ តួយ៉ាងដូចជាប្រកួតកាលប៉ះ Alaves, Getafe, Real Madrid…. ព្រោះយើងបង្កើតឱកាសច្រើនណាស់ បែបនេះយើងត្រូវតែខំប្រឹងរួមគ្នាដើម្បីទាញក្រុមឲ្យមកឈរចំណាត់ថ្នាក់កំពូលវិញ”៕
ប្រភព៖ Goal