នៅក្របខ័ណ្ឌកំពូលទាំង ៥ ប្រចាំតំបន់អឺរ៉ុប នារដូវកាល ២០២០/២១ ហាក់មានការប្រកួតប្រជែងគ្នាខ្លាំងពីមួយសប្តាហ៍ទៅមួយសប្តាហ៍។
ក្រុមខ្លះក៏រកឃើញតំបន់សុវត្ថិភាពរបស់ខ្លួនជាបណ្តើរៗ ខណៈក្រុមខ្លះទៀតដែលរងបរាជ័យឥតឈប់ ក៏កំពុងភ័យព្រួយ ខ្លាចធ្លាក់ទៅតំបន់ដែលត្រូវកាត់ឈ្មោះនៅបញ្ចប់រដូវកាល។ បង្វែរទៅជ្រុងមួយ អ្នកដឹងទេថាគិតត្រឹមពាក់កណ្តាលរដូវកាលនេះ តើក្រុមណាខ្លះដែលមិនទាន់ស្គាល់ពាក្យថា “ចាញ់”?
រាប់នៅលីគកំពូលទាំង ៥ មាន Premier League, La Liga, Serie A, Ligue 1 និង Bundesliga គឺមានតែ ២ ក្រុមប៉ុណ្ណោះ ដែលទទួលលទ្ធផលឈ្នះ និងស្មើគ្រប់ការប្រកួត ហើយមិនទាន់ស្គាល់បរាជ័យ។
នោះគឺក្រុមរួមលីគតែមួយ មានដូចជា AC Milan និង Juventus។ សម្រាប់ក្រុមដឹកនាំដោយលោក Stefano Piolli នៅ ១៣ ប្រកួត ឈ្នះ ៩ ស្មើ ៤ មាន ៣១ ពិន្ទុ កំពូលឈរកំពូលតារាង Serie A រីឯក្រុមដឹកនាំដោយលោក Andrea Pirlo នៅ ១៣ ប្រកួត ឈ្នះ ៧ ស្មើ ៦ មាន ២៧ ពិន្ទុឈរនៅចំណាត់ថ្នាក់ទី ៣។
ដោយឡែកបើបង្វែរទៅក្រុមដែលមិនទាន់ស្គាល់ពាក្យថា “ឈ្នះ” វិញ គឺមានតែ ១ ប៉ុណ្ណោះ នោះគឺ Sheffield United ដែលកំពុងឈរនៅបាតតារាងក្របខ័ណ្ឌ Premier League ក្រោយ ១៤ ប្រកួត ស្មើ ២ ចាញ់ ១២ មានតែ ២ ពិន្ទុគត់៕