Marcus Rashford មុនទទួលបានជោគជ័យក្នុងវិស័យកីឡាបាល់ទាត់ទល់សព្វថ្ងៃនេះ កាលពីអតីតកាលគេក៏ធ្លាប់ជាក្មេងក្រខ្សត់ និងគ្រួសារខ្វះភាពកក់ក្ដៅ ព្រោះដោយសារឪពុកម្ដាយរបស់គេរស់នៅបែកខ្ញែកពីគ្នា។
ជីវិតកាលនៅកុមារភាព Rashford រស់នៅជាមួយម្ដាយនិងបងប្អូនបង្កើត ២ រូបឯទៀត។ ម្ដាយរបស់ខ្សែប្រយុទ្ធសញ្ជាតិអង់គ្លេស មានឈ្មោះ Melanie Maynard ហើយកន្លងទៅនេះ លោកស្រីបានជីកកកាយដល់រឿងរ៉ាវកម្សត់កាលនៅខ្វះខាត មុននឹងទទួលបានជីវិតដ៏ស្រស់បំព្រងដូចសព្វថ្ងៃ។
ប្រាប់នៅកិច្ចសម្ភាសន៍ជាមួយ BBC អ្នកស្រី Melanie មានប្រសាសន៍ថា៖ “ខ្ញុំបារម្ភខ្លាំងជាងគេ គឺខ្លាចគ្មានអ្វីឲ្យកូនៗរបស់ខ្ញុំបរិភោគ ហើយពេលខ្លះទៅនៅផ្ទះរបស់យើងមិនមាននំប៉័ងគ្រប់គ្រាន់ទេ ដោយមានពេលខ្លះពួកគេធ្លាប់សួរខ្ញុំថា ម៉ាក់បានអាហារចូលពោះហើយឬនៅ? ខ្ញុំក៏ឆ្លើយវិញថា ម៉ាក់ញុាំហើយៗ ទាំងដែលការពិតខ្ញុំមិនទាន់បានបរិភោគអ្វីទាំងអស់”។
អ្នកស្រីបន្តទៀតថា៖ “កាលនោះខ្ញុំបម្រើការជាអ្នកចេញបុងនៅហាងផ្តល់សេវាកម្មកម្សាន្ត Ladbrokes ហើយក៏ជាអ្នកបោសសម្អាតនៅទីនោះដែរ និងឆ្លៀតពេលថ្ងៃសៅរ៍ចុងសប្ដាហ៍ខ្ញុំទៅលានចានឲ្យគេ ពោលគឺធ្វើបែបណាឲ្យតែកូនៗរបស់ខ្ញុំអាចរស់រានបន្តទៅទៀត”។
“លុះមកទល់ពេលនេះ Rashford គេមានលទ្ធភាពអាចផ្តល់ផ្ទះរស់នៅស្រួលមួយឲ្យខ្ញុំ ហើយជួនខ្លះទៅខ្ញុំអង្គុយសុខៗក៏ស្រក់ទឹកភ្នែក នៅពេលដែលគិតដល់ចំណុចចាប់ផ្តើមនៃជីវិត មុនយើងអាចឈានមកដល់ចំណុចនេះ”។
គួរបញ្ជាក់ថា ការខិតខំនិងភាពអំណត់អត់ធន់របស់ម្តាយ ទីបំផុតក៏បានត្រួសត្រាយផ្លូវឲ្យកូនប្រុសដែលពោរពេញដោយទេពកោសល្យក្នុងវិស័យកីឡាបាល់ទាត់ នោះគឺ Marcus Rashford ប្រែក្លាយជាកីឡាករមានឈ្មោះបោះសំឡេងមួយរូបនៅលីគកំពូលអឺរ៉ុប និងបច្ចុប្បន្នត្រឹមតែថ្លៃពលកម្មមួយសប្តាហ៍ គេអាចកើបលុយចូលហោប៉ៅដល់ជាង ២៧ មុឺនដុល្លារ ហើយល្ហៀងៗថាត្រៀមបានកុងត្រាថ្មីជាង ៤០ មុឺនដុល្លារ/សប្តាហ៍ទៀតផង៕
ប្រភព៖ TheSun