ខ្សែប្រយុទ្ធ Sergio Aguero កំពុងមានបញ្ហារបួសជង្គង់ធ្ងន់ធ្ងរមែនទែន ហើយវាបានបង្កឱ្យរូបគេអវត្តមានជាច្រើនប្រកួតនារដូវកាលនេះ។
ជាក់ស្ដែងទល់ក្រុម West Brom កន្លងទៅ គឺរូបគេលេងបានត្រឹមតែ១៤នាទីប៉ុណ្ណោះ។ ហើយក្រោយមក ក៏សប្ដាហ៍នេះមិនបានចូលហាត់ដែរ ដោយសារតែជង្គង់ឈឺនៅឡើយ។ បញ្ហាជាប់រហូតនេះ ធ្វើឱ្យលោក Pep ឈឺក្បាលមែនទែន ព្រោះមិនមានប្រយុទ្ធកណ្ដាលល្អម្នាក់ដើម្បីជួយក្រុមទាល់តែសោះ។
កីឡាករវ័យ៣២ឆ្នាំបាននិយាយពីរបួសរបស់ខ្លួនថា វាបង្កផលប៉ះពាល់ច្រើន។ ម្ដងជង្គង់នេះឈឺ ម្ដងមិនឈឺនោះទេ។ រូបគេបានធ្វើតាមការណែនាំរបស់ក្រុមគ្រូពេទ្យជាប់មករហូត ប៉ុន្តែវាហាក់ដូចជាមិនបានប្រសើរឡើងទាល់តែសោះ។ Aguero សង្ឃឹមថាសុបិនអាក្រក់នេះ នឹងឆាប់រំលងទៅលឿនបំផុត៕
ប្រភព៖ DailyMail