ក្រុមបិសាចក្រហម Manchester United នឹងត្រូវប្រកួតជាមួយក្រុម Sheffield United នៅម៉ោង៣រំលងអាធ្រាត្រនេះ សម្រាប់ការប្រកួតពានរង្វាន់ English Premier League ។
វាជាការចាប់ផ្ដើមប្រកួតក្នុងពេលវេលាមមាញឹកបំផុតមួយនៅអង់គ្លេស ដោយក្រុមទាំងអស់នឹងត្រូវលេងកៀកថ្ងៃគ្នាខ្លាំងមែនទែន។ ដោយ Man Utd នេះគិតចាប់ពីប្រកួតយប់នេះទៅ ពួកគេនឹងត្រូវលេងដល់ទៅ៦ប្រកួត ក្នុងរយៈពេល១៦ថ្ងៃប៉ុណ្ណោះ។ យ៉ាងណាមិញ ការលេងញឹកគ្នានេះ ត្រូវបានលោក Ole យល់ឃើញថាជាពេលល្អ សម្រាប់ក្រុមដើម្បីបង្ហាញភាពខ្លាំងរបស់ខ្លួនទៅវិញ។
អ្នកចាត់ការក្រុមបិសាចក្រហមខាងលើបាននិយាយថា៖ “នេះគឺជាការប្រកួតធំមួយសម្រាប់ក្រុមយើង។ ខ្ញុំនឹងអស់សង្ឃឹមប្រសិនបើកីឡាករទាំងអស់ មិនបានដាក់ចិត្តដើម្បីប្រកួតប្រជែងនេះ។ វាជាប្រកួតតឹងតែង ប៉ុន្តែវាក៏នឹងធ្វើឱ្យយើងអាចបង្ហាញថាយើងជាក្រុមប្រជែងពានរង្វាន់មួយផងដែរ”៕ប្រភព Dailymail
