ក្រុមបិសាចក្រហម Manchester United នឹងត្រូវជួបគ្នាទល់ក្រុមខ្លាំង Real Sociedad នៅការប្រកួតវគ្គ ៣២ ក្រុមចុងក្រោយ ពានរង្វាន់ UEFA Europa League ហើយការប្រកួតនេះត្រូវបានគេទទួលស្គាល់ថាជាជំនួបដ៏ញាក់សាច់មួយប្រចាំពានលំដាប់ទី ២ របស់ UEFA។
លោក Solskjaer ក៏បាននិយាយមុនការប្រកួតហើយដែរ ថាប៉ះ Sociedad គឺប្រៀបដូចជាការចាប់ឆ្នោតប៉ះក្រុមនៅ Champions League អ៊ីចឹង ព្រោះក្រុមនៅអេស្ប៉ាញនេះកំពុងឡើងកូដខ្លាំង។
ប្រាប់សារព័ត៌មានផ្លូវការរបស់ United អ្នកចាត់ការសញ្ជាតិន័រវែសនិយាយ៖ “វាដូចជាការចាប់ឆ្នោតនៅ Champions League ព្រោះពួកគេ [Real Sociedad] ជាក្រុមនៅកំពូលតារាង La Liga នៅពេលនេះ ដែលនាំមុខទាំង Atletico Madrid, Barcelona និង Real Madrid ទៅទៀត”។
លោកសង្កត់ធ្ងន់៖ “ខ្ញុំបានមើលការលេងរបស់ពួកគេប៉ុន្មានដងដែរ ហើយពួកគេគឺជាក្រុមដ៏គួរឲ្យចាប់អារម្មណ៍ និងជារសជាតិថ្មីសម្រាប់ពួកយើង ដោយយើងបានឆ្លងកាត់ការប្រកួតលំបាកច្រើនណាស់កំឡុងពេលនេះ”៕
ប្រភព៖ Metro