អ្នកចាត់ការក្រុម Barcelona លោក Ronald Koeman ហាក់មិនបោះបង់ងាយៗនោះទេ ដោយនៅតែសង្កត់ធ្ងន់ថាឱកាសប្រជែងពាន La Liga សម្រាប់ក្រុមខ្លួននៅបន្តមាន បើទោះបីចំណាត់ថ្នាក់របស់អ្នកមានបុណ្យពេលនេះឈរនៅលេខ ៨ ក៏ដោយ។
កាលពីយប់មិញ Barcelona បានយកឈ្នះ ៣ ពិន្ទុពី Levante ក្រោយការរកគ្រាប់បាល់ទី ៥ របស់ Messi នៅរដូវកាល ២០២០/២១។
ជុំវិញស្ថានភាពរបស់ក្រុម អ្នកចាត់ការសញ្ជាតិហូឡង់និយាយថា៖ “តាមពិតទៅយើងនៅតែអាចឈ្នះពាន ប្រសិនយើងពង្រឹងបន្ថែម និងមានទំនុកចិត្តជាងនេះ ហើយបន្ថែមប្រសិទ្ធភាព [នៃការបញ្ចប់ទី] នោះគឺមានឱកាស ព្រោះសេសសល់ប្រកួតច្រើនទៀតណាស់”។
និយាយដល់ការធ្លាក់ទម្រង់លេងរបស់ M10 អ្នកចាត់ការ Koeman នៅតែលើកទឹកចិត្តថា៖ “អ្នកត្រូវយល់ថាគ្រប់គ្នាមិនឲ្យ Messi ទទួលបានឱកាសងាយៗនោះទេ ព្រោះគេទទួលបានការរារាំងពីកីឡាករជាច្រើន ប៉ុន្តែ Messi ក៏គេនៅតែបង្ហាញពីភាពខ្លាំងរបស់គេដែរ”៕
ប្រភព៖ Marca