ក្លឹប Juventus បានសម្រេចបោះបង់ការប្រកួតមិត្តភាព១ចោល បន្ទាប់ពីមានអ្នកគាំទ្រជាច្រើនរយនាក់បានរត់ចូលទីលាន ដើម្បីសុំថត Selfie ជាមួយ Cristiano Ronaldo ។
ម្សិលមិញនេះ ក្រុម Juventus បានធ្វើការប្រកួតមិត្តភាពកម្ដៅសាច់ដុំមួយ រវាងឈុតជាមួយឈុតយុវជន។ ក្នុងការប្រកួតនោះដែរ Ronaldo បានចូលលេងកម្ដៅសាច់ដុំផងដែរ ហើយក៏រកគ្រាប់បាល់បាន ជួយក្រុមឈ្នះក្នុងលទ្ធផល ៥-០។ ការប្រកួតមិនទាន់បញ្ចប់ផង នៅសល់២០នាទីចុងក្រោយ ស្រាប់តែមានអ្នកគាំទ្រជាច្រើនរយនាក់ សម្រេចចិត្តរត់ចូលទីលានតែម្ដង ដើម្បីបានប៉ះ Ronaldo និងសុំថតរូបជាមួយគ្នា។
ដោយសារតែមានអ្នកគាំទ្ររត់ចូលចាប់មិនឈ្នះនេះហើយ ក្លឹបក៏សម្រេចបោះបង់ការប្រកួតនោះចោល ២០នាទីចុងក្រោយតែម្ដងទៅ ព្រោះថាសូម្បីសន្តិសុខ ក៏បានមកសុំ Ronaldo ថតដែរទៅហើយ មិនបានជួយឃាត់អ្នកគាំទ្រឡើយ។ គេសង្កេតឃើញថាវត្តមានរបស់ Ronaldo នៅក្លឹប Juventus ពិតជាទទួលបានការគាំទ្រខ្លាំងមែនទែន ដោយនៅអ៊ីតាលីអ្នកគាំទ្របាល់ទាត់ទាំងអស់ស្រលាញ់កីឡាករព័រទុយហ្គាល់រូបនេះខ្លាំងណាស់៕ប្រភព៖ DailyMail
