នៅក្នុងវិស័យកីឡាបាល់ទះ កម្ពស់របស់កីឡាករគឺជាកត្តាដ៏សំខាន់បំផុតមួយ ដោយនៅស្តង់ដារអន្តរជាតិសម្រាប់បាល់ទះផ្នែកបុរសគេយកកម្ពស់ ១,៨៥ ទៅ ២,១០ ម៉ែត្រ រីឯផ្នែកនារីគេយកកម្ពស់ ១,៧០ ទៅ ១,៩៥ ម៉ែត្រ។
ប៉ុន្តែក៏មានកីឡាករខ្លះអាចមានកម្ពស់ខ្ពស់ជាងការកំណត់ខាងលើផងដែរ ហើយពួកគេរមែងមានឈ្មោះនៅកំណត់ត្រានាមកីឡាករខ្ពស់ដាច់គេហើយ។ តទៅនេះទំព័រ CTS Sports សូមណែនាំឲ្យស្គាល់កីឡាករបាល់ទះផ្នែកបុរស ៥ រូប ដែលមានកម្ពស់ខ្ពស់បំផុត៖
៥) Renan Zanatta Buiatti កម្ពស់ ២,១៧ ម៉ែត្រ ទម្ងន់ ១១០ គ.ក លោតខ្ពស់ដល់ ៣,៦០ ម៉ែត្រ
កីឡាករវ័យ ៣០ ឆ្នាំរូបនេះ បច្ចុប្បន្នកំពុងលេងឲ្យក្លឹប Tours VB របស់បារាំង និងជាសមាជិកក្រុមជម្រើសជាតិប្រេស៊ីល ដែលលេងតួនាទីជា អ្នកវ៉ៃខាងមុខ (Opposite) ។ ក្នុងអាជីពរយៈពេលជាង ១០ ឆ្នាំរបស់គេគឺជោគជ័យខ្លាំង ដោយធ្លាប់ឈ្នះមេដាយជាច្រើនគ្រឿងនៅជម្រើសជាតិ និងបណ្តាក្លឹបដែលគេធ្លាប់ហែលកាត់។
៤) Bartlomiej Lemanski កម្ពស់ ២,១៧ ម៉ែត្រ ទម្ងន់ ១១៥ គ.ក លោតខ្ពស់ដល់ ៣,៦៥ ម៉ែត្រ
កីឡាករវ័យ ២៤ ឆ្នាំ ចាប់ផ្តើមលូតកម្ពស់ខ្លាំងនៅពេលគេមានអាយុ ១៣ ឆ្នាំ ហើយចាប់តាំងពីពេលនោះមកការស្វែងរកសំលៀកបំពាក់ ឬស្បែកជើងជាដើម គឺពិបាកតម្រូវខ្លាំងណាស់។ បច្ចុប្បន្នគេពាក់ស្បែកជើងទំហំលេខ ៥០ ហើយក្នុងអាជីពបាល់ទះគេជាសមាជិកក្រុមជម្រើសជាតិប៉ូឡូញ នៅតួនាទីជា អ្នកលោតបាំង (Middle Blocker)។
៣) Dmitrij Muserskiy កម្ពស់ ២,១៨ ម៉ែត្រ ទម្ងន់ ១០៤ គ.ក លោតខ្ពស់ដល់ ៣,៧៥ ម៉ែត្រ
កីឡាករវ័យ ៣២ ឆ្នាំរូបនេះ អាចលេងបានទាំងនៅតួនាទីជា អ្នកវ៉ៃខាងមុខ (Opposite) និង អ្នកលោតបាំង (Middle Blocker) ហើយនៅជម្រើសជាតិរុស្ស៊ីលោកប្រលូកអស់រយៈពេល ១០ ឆ្នាំហើយ។ បច្ចុប្បន្នកំពុងលេងឲ្យក្លឹបបាល់ទះ Suntory Sunbirds នៅឯប្រទេសជប៉ុន។
២) Wuttichai Suksara កម្ពស់ ២,២៤ ម៉ែត្រ ទម្ងន់ ១២០ គ.ក លោតខ្ពស់ដល់ ៣,៥០ ម៉ែត្
កីឡាករសញ្ជាតិថៃរូបនេះ ពេលនៅអាយុ ១៣ ឆ្នាំមានកម្ពស់ ១,៩៨ ម៉ែត្រទៅហើយ។ គេធ្លាប់ជាសមាជិកដែលជួយឲ្យជម្រើសជាតិថៃឈរលេខ ៧ នៅ ASIAN Games ឆ្នាំ ២០១៤។ និយាយដល់ទំហំស្បែកជើងរបស់ Wuttichai វិញ គឺគេពាក់ស្បែកជើងលេង ៥៦ ឯណោះ។
១) Morteza Mehrzad កម្ពស់ ២,៤៦ ម៉ែត្រ
បុរសវ័យ ៣៣ ឆ្នាំរូបនេះ ជាបុគ្គលដែលមានកម្ពស់ខ្ពស់ជាងគេនៅប្រទេសអ៊ីរ៉ង់ ប៉ុន្តែជាកីឡាករនៅប្រភេទបាល់ទះបែបអង្គុយ។ នោះក៏ដោយសារតែ Morteza បានជួបគ្រោះថ្នាក់កាលពីនៅអាយុ ១៦ ឆ្នាំ ហើយធ្វើឲ្យជើងខាងស្តាំឈប់លូតលាស់ ខណៈបច្ចុប្បន្នផ្នែកជើងខាងស្តាំរបស់លោកមានកម្ពស់ខ្លីជាងជើងខាងឆ្វេងដល់ទៅ ១៥ សង់ទីម៉ែត្រ បែបនេះលោកអាចបានត្រឹមឈរធម្មតា តែបើឲ្យហក់លោតគឺមិនអាចនោះឡើយ៕
ប្រភព៖ VolleyballPassion