Georgina Rodriguez កំពុងធ្វើឲ្យនារីជាច្រើនក្នុងលោក មានការច្រណែននឹងវាសនារបស់នាង ក្រោយពីបានក្លាយជាគូស្នេហ៍និងអាចជានារីចុងក្រោយ ក្នុងបេះដូងរបស់តារាបាល់ទាត់ឆ្នើម Cristiano Ronaldo។
ប៉ុន្តែធាតុពិតវាមិនដូចអ្វីដែលអ្នកគិតទាំងស្រុងនោះទេ ហើយ Georgina ក៏មិនមែនជាកូនអ្នកធូរធារមានទ្រព្យស្តុកស្តមអ្វីដែរ មុនទទួលបានជីវិតដ៏ស្រស់បំព្រងនៅថ្ងៃនេះ។ តើអ្នកដឹងទេថា ស្រ្តីកូនកាត់អាហ្សង់ទីន-អេស្ប៉ាញរូបនេះ ធ្លាប់ជានារីរត់តុ ហើយកំព្រាម្តាយ និងឪពុកត្រូវជាប់ពន្ធនាគារ?
Georgina Rodriguez កើតនៅទីក្រុង Jaca ប្រទេសអេស្ប៉ាញ ដែលមានម្តាយជាជនជាតិអេស្ប៉ាញ និងឪពុកជាជនជាតិអាហ្សង់ទីន។ នាងកើតនៅថ្ងៃទី ២៧ មករា ឆ្នាំ ១៩៩៤ ហើយតាំងពីតូចមក Georgina មានក្តីស្រមៃចង់ក្លាយជាអ្នករាំរបាំបាឡេដ៏ល្បីល្បាញមួយរូប។ ប៉ុន្តែដោយសារជីវភាពខ្វះខាត នាងក៏បានសម្រេចចិត្តទុកក្តីស្រមៃនោះមួយឡែកសិន ហើយបង្វែរមករៀនជំនាញអ្នករចនាម៉ូត ឬ Fashion Design។
អ្វីដែល Georgina ចង់ធ្វើ ចង់បាន តែងតែទទួលបានការរាំងស្ទះ សឹងតែពេលខ្លះនាងចង់បោះបង់ចោលគ្រប់យ៉ាង ជាពិសេសនៅពេលដែលម្ដាយរបស់នាងបានទទួលមរណភាពនៅឆ្នាំ ២០១១ ពេលនាងមានអាយុ ១៧ ឆ្នាំ ហើយឪពុករបស់នាងជាប់ពន្ធនាគារពីបទជួញដូរសារធាតុកូកាអ៊ីនខុសច្បាប់ (បញ្ជាក់៖ លោកត្រូវបានដោះលែងនៅឆ្នាំ ២០១៣)។
ប៉ុន្តែដោយសារឆន្ទៈរឹងមាំ Georgina នៅតែពុះពារប្រើគ្រប់វិធីដើម្បីរកលុយចិញ្ចឹមខ្លួនឯងនិងផ្គត់ផ្គង់ការសិក្សាទាំងស្ថិតនៅស្រករអាយុដែលយុវនារីភាគច្រើនកំពុងពេញសប្បាយរីករាយ។ ការងារដំបូងរបស់នាងគឺជានារីរត់តុនៅអាហារដ្ឋានមួយ ដើម្បីបានលុយទុកចិញ្ចឹមក្រពះ ហើយកន្លងផុតមួយរយៈនាងបានសម្រេចចិត្តផ្ទេរមករស់នៅក្នុងទីក្រុងឡុង ចក្រភពអង់គ្លេស ជាអ្នកមើលថែក្មេងតាមផ្ទះ និងឆ្លៀតពេលនោះដើម្បីក្រេបជញ្ជក់ឲ្យខ្លួនចេះប្រើប្រាស់ភាសាអង់គ្លេស។
រំលងប៉ុន្មានឆ្នាំបន្ទាប់ ស្រីស្អាតសម្បុរស្រអែមបានវិលត្រលប់មកប្រទេសកំណើត និងក្លាយជាមនុស្សថ្មីមួយផ្សេងទៀត ដោយបម្រើការជាបុគ្គលិកផ្នែកលក់ នៅឯហាងយីហោល្បីឈ្មោះ Gucci ក្នុងទីក្រុង Madrid ប្រទេសអេស្ប៉ាញ។ លុះដល់ឆ្នាំ ២០១៦ គឺជាឆ្នាំដែលបានផ្លាស់ប្តូរជីវិតរបស់នាង ទៅកាន់ពិភពស្រស់បំព្រងថ្មីមួយផ្សេងទៀត ដោយមានថ្ងៃមួយនោះតារាបាល់ទាត់ល្បីឈ្មោះ Cristiano Ronaldo បានចូលមកក្នុងហាង Gucci ហើយស្នេហាកាំរន្ទះក៏បានកើតឡើង។ ត្រង់នេះអាចថាជាសំណាង គួបផ្សំនឹងសម្រស់ដ៏ស្រស់ស្អាតរបស់ Georgina ដែលរុញឲ្យ Ronaldo ដកចិត្តមិនរួចពីនាង ហើយប្រកាសពីការណាត់ជួបជាសាធារណៈមួយនៅចុងឆ្នាំ ២០១៦។
មកទល់ពេលបច្ចុប្បន្ន Georgina បានក្លាយជាម្តាយរបស់កូនទាំង ៤ ហើយមានមួយឈ្មោះ Alana Martina គឺជាកូនបង្កើតរបស់នាងដែលកើតនៅឆ្នាំ ២០១៧។
ជីវិតរបស់នាងបានផ្លាស់ប្ដូរ ១៨០ ដឺក្រេ ក្រោយការខិតខំប្រឹងប្រែងអស់រយៈពេលជាង ១០ ឆ្នាំ ទីបំផុតក្នុងពេលនេះនាងត្រៀមក្លាយជាអនាគតភរិយារបស់ Ronaldo ដែលមានទ្រព្យច្រើនជាង ១ ពាន់លានដុល្លារ និងអាជីពរបស់នាងផ្ទាល់គឺជា Influencer ល្បីឈ្មោះមួយនៅលើបណ្តាញសង្គមដែលរកបានចំណូលខ្ទង់លានដុល្លារ ហើយក៏ជាតារាម៉ូដែល និងបានបំពេញក្តីស្រមៃកាលពីនៅតូចនោះគឺក្លាយជានារីរាំរបាំបាឡេដ៏ស្រស់ស្អាត។
ពាក្យបំផុសទឹកចិត្តមួយដែល Georgina បានប្រាប់ទៅអ្នកគាំទ្ររបស់នាង គឺថា៖ “ត្រូវជឿជាក់លើខ្លួនអ្នកនិងឥទ្ធិពលនៃការខិតខំរបស់អ្នក ហើយត្រូវចាំថាជីវិត មិនមែនជាការប្រណាំងប្រជែងគ្នានោះទេ ផ្ទុយទៅវិញវាគឺជាដំណើរផ្សងព្រេងដ៏វែងឆ្ងាយ ដែលអ្នកត្រូវហែលកាត់និងរៀនសូត្រនូវរឿងជាច្រើន ដើម្បីឲ្យគ្រួសារនិងសង្គមជាតិមានមោទនភាពជាមួយអ្នក”៕
ប្រភព៖ TheSun | OhMyGoal