ក្លឹប Juventus ដែលមានតារាឆ្នើម Cristiano Ronaldo និងក្លឹប Barcelona ដែលមានតារាឆ្នើម Lionel Messi សុទ្ធសឹងតែបានជាប់ឈ្មោះឡើងទៅកាន់វគ្គ ១៦ ក្រុមចុងក្រោយ UEFA Champions League រដូវកាល ២០២០/២១។
ដើម្បីក្លែមញាំងឲ្យការទស្សនារបស់អ្នកកាន់តែជក់ចិត្តដិតអារម្មណ៍ អ្នកគាំទ្រគួរតែបានដឹងនូវស្ថិតិនិងកំណត់ត្រាមួយចំនួន ដែល CR7/M10 មានឱកាសអាចបំបែកបាននៅខាងមុខ។ តាមរបាយការណ៍ពី UEFA យើងធ្វើការបង្ហាញកំណត់ត្រាធំៗ ៥ ដែលអ្នកទាំងពីរមិនទាន់អាចធ្វើបាន៖
៥) ការរកបានគ្រាប់បាល់ច្រើនបំផុតនៅវគ្គផ្តាច់ព្រ័ត្រ
កំណត់ត្រានេះនៅបន្តគ្រោងដោយអតីតជើងចាស់របស់ Real Madrid គឺលោក Alfredo Di Stefano និង Ferenc Puskas ដែលរកបាន ៧ គ្រាប់។ ក្រឡេកទៅ Messi មានតែ ២ គ្រាប់ប៉ុណ្ណោះ នោះគឺនៅឆ្នាំ ២០០៩ និង ២០១១ ហើយ Ronaldo មាន ៤ គ្រាប់នៅឆ្នាំ ២០០៨, ២០១៤ និង ២០១៧ ចំនួនពីរគ្រាប់។
៤) ការបង្ហាញខ្លួនច្រើនបំផុត
នៅប្រកួតពានរង្វាន់អឺរ៉ុប Champions League អ្នកដែលបង្ហាញខ្លួនច្រើនបំផុត នោះគឺ Iker Casillas ដែលមានដល់ទៅ ១៧៧ ប្រកួត រីឯ Cristiano Ronaldo គិតត្រឹមបញ្ចប់វគ្គចែកពូល បង្ហាញខ្លួនបាន ១៧៤ ប្រកួត និង Messi បាន ១៤៧ ប្រកួត។ កំណត់ត្រានេះសម្រាប់កីឡាករព័រទុយហ្គាល់អាចនឹងធ្វើបាននៅឆ្នាំក្រោយ ២០២១។
៣) ឈ្នះពាននៅក្រុមច្រើនផ្សេងពីគ្នា
អតីតកីឡាករ Calrence Seedorf គឺជាមនុស្សតែម្នាក់គត់ដែលអាចឈ្នះពានរង្វាន់ Champions League នៅក្រុម ៣ ផ្សេងពីគ្នា ដោយមានកាលនៅ Ajax, Real Madrid និង AC Milan។ សម្រាប់ Ronaldo ឈ្នះបាន ២ លើកហើយពេលនៅ Man Utd និង Real Madrid ដោយរង់ចាំតែជាមួយ Juventus មួយទៀតប៉ុណ្ណោះ ហើយ Messi ដែលឈរជើងនៅក្លឹបទោល Barcelona ប្រហែលជាពិបាកក្នុងការប្រជែងកំណត់ត្រានេះ។
២) កីឡាកររកបានគ្រាប់បាល់ទាំងស្ថិតនៅវ័យចំណាស់បំផុត
ត្រលប់ទៅខែតុលា ឆ្នាំ ១៩៨៨ នៅការប្រកួតរវាង Werder Bremen និង Dynamo Berlin កីឡាករជើងចាស់លោក Manfred Burgsmuller បានរកគ្រាប់បាល់ ទាំងស្ថិតនៅវ័យ ៣៨ ឆ្នាំ និង ២៩៣ ថ្ងៃ ដោយកាលនោះគឺ Champions League នៅមានឈ្មោះជា European Cup។ ចំពោះកំណត់ត្រានេះ Ronaldo អាចធ្វើបាន នៅក្រោយថ្ងៃទី ២២ វិច្ឆិកា ឆ្នាំ ២០២៣ និង Messi ក្រោយថ្ងៃទី ១៣ មេសា ឆ្នាំ ២០២៦ ហើយមិនថាវគ្គណាក៏ដោយ ឲ្យតែរកបានគ្រាប់បាល់។
១) គ្រាប់បាល់ប្រើថេរវេលាតិចបំផុត
កំណត់ត្រាគ្រាប់បាល់ចាយពេលរហ័សបំផុត នោះគឺធ្វើបានដោយកីឡាករ Roy Makaay នៅឆ្នាំ ២០០៧ ពេល Bayern Munich លេងប៉ះ Real Madrid ហើយគេប្រើពេលត្រឹម ១០,១២ វិនាទីប៉ុណ្ណោះ រាប់ក្រោយពេលបាល់កែចេញពីជើង។
សម្រាប់ Ronaldo វិញ គ្រាប់បាល់លឿនបំផុតគេធ្លាប់ធ្វើបាន គឺនៅឆ្នាំ ២០១៣ ប្រើពេល ៤ នាទី និង Messi នៅឆ្នាំ ២០១៦ ប្រើពេល ៣ នាទី ខណៈក្រោម ១ នាទីមិនទាន់ធ្វើបាននៅឡើយ តែឱកាសក៏នៅតែមាន ដរាបណាអ្នកទាំងពីរមិនទាន់ចូលនិវត្ត៕