គ្រូបង្វឹកក្លិបភ្នំពេញក្រោនលោក Oleg Starynskyi បានបង្ហាញអំពីការអភិវឌ្ឍន៍របស់ក្រុមក្រោយដឹកនាំហ្វឹកហាត់បានមួយសប្ដាហ៍ដំបូងប៉ុណ្ណោះ ដោយសារដោយសារតែបញ្ហាកូវីដ១៩ ដែលតម្រូវឲ្យកាត់បន្ថយការជួបជុំ និងប្រមូលផ្តុំ ប៉ុន្តែក្រុមមានការសហការគ្នាបានល្អ។
« ខ្ញុំមានអារម្មណ៍ល្អណាស់សម្រាប់ការជួបជុំពួកគេជាលើកដំបូងនេះ ពួកគេមានការប្តេជ្ញាចិត្ត និងត្រៀមខ្លួនរួចរាល់ហើយសម្រាប់ការធ្វើការ ខ្ញុំក៏មើលឃើញដែលថាពួកគេមានឆន្ទៈក្នុងការប្រកួតប្រជែងជាមួយក្រុមល្អៗនៅក្នុងលីគ » ។
Oleg បានបន្តទៀតថា៖ « ស្ថិតក្នុងដំណាក់កាលនេះ ជាពេលវេលាដែលល្អបំផុតក្នុងការបន្ថែមគុណភាពរបស់ពួកគេលើទីលាន ព្រោះការធ្វើការខ្លាំងលើទីលានតែមួយមុខមិនគ្រប់គ្រាន់ឡើយ វាតម្រូវឲ្យយើងធ្វើការបន្ថែមទៀតដើម្បីជាកីឡាករអាជីព ។ កីឡាករត្រូវតែមានគុណភាពទាំងបច្ចេកទេស និងការសម្រេចចិត្តលើទីលាន ហើយបូករួមជាមួយនឹងគំនិតនៃការចង់ឈ្នះ ដើម្បីបង្កើតឱកាសលេង និងមានលទ្ធផលល្អដល់ក្លឹប »។
« ខ្ញុំចង់បញ្ជាក់ពីវត្តមានរបស់ប្រធានក្លឹបដែលបានចូលរួមជាមួយយើងក្នុងថ្ងៃដែលយើងហ្វឹកហាត់ដំបូងផងដែរ គាត់មកដើម្បីជម្រុញ និងលើកទឹកចិត្តយើង ទាំងអស់នេះពិតជាជួយយើងខ្លាំងណាស់ក្នុងការបង្កើឲ្យមានភាពស្និតស្នាលក្នុងក្រុមផងដែរ » ៕
ប្រភពនិងរូបភាព៖ ភ្នំពេញក្រោន