អ្នកចាត់ការក្លឹប Tottenham Hotspur គឺលោក Jose Mourinho បានបង្ហាញការយល់ឃើញថា ក្លឹបទើបតែធ្លាក់ពី Champions League នោះគឺបិសាចក្រហម Manchester United នឹងមានភាគរយខ្ពស់អាចឈ្នះពានរង្វាន់ Europa League រដូវកាលនេះ។
បញ្ជាក់ថា United បានបរាជ័យ ៣-២ នៅជុំចុងក្រោយទល់ RB Leipzig ហើយធ្វើឲ្យពួកគេបាត់បង់ឱកាសឆ្ពោះទៅកាន់វគ្គ ១៦ ក្រុម និងត្រូវធ្លាក់មកចូលរួមការប្រកួតនៅ Europa League នាមជាក្រុមលេខ ៣ ក្នុងពូលដែលមានពិន្ទុខ្ពស់បំផុត។
ផ្សាភ្ជាប់នឹងបរាជ័យនេះ បុរសមានរហ័សនាម “Special One” ដែលធ្លាប់ជាអតីតគ្រូបង្វឹកនៅ Old Trafford បាននិយាយថា៖ “Manchester United បានក្លាយជាក្រុមមួយដែលមានភាគរយខ្ពស់អាចឈ្នះពានរង្វាន់ ព្រោះក្រុមដែលធ្លាក់មកពី Champions League គឺពួកគេរឹងមាំខ្លាំងណាស់ ហើយជាទូទៅមានប្រៀបជាងក្រុមនៅ Europa League”។
អ្នកចាត់ការសញ្ជាតិព័រទុយហ្គាល់បន្តទៀតថា៖ “United ស្ថិតនៅចំណោមក្រុមកំពូល ដោយនៅក្នុងពូលរបស់ពួកគេគឺពិតជាតានតឹងខ្លាំងណាស់ ដែលមាន Paris Saint-Germain និង Leipzig ហើយយើងក៏បានដឹងហើយដែរ ថាវាមិនមែនជារឿងនោះឡើយសម្រាប់ពួកគេ”។
រំឭកដែរថាបិសាចក្រហម ធ្លាប់ឈ្នះពានរង្វាន់ Europa League បាន ១ លើកនៅរដូវកាល ២០១៦/១៧ ដែលឆ្នាំនោះគឺស្ថិតនៅក្រោមការដឹកនាំរបស់លោក Jose Mourinho ក្រោយយកឈ្នះ Ajax ៣-០ ក្នុងវគ្គផ្ដាច់ព្រ័ត្រ៕
ប្រភព៖ Goal