ខ្សែបម្រើ Pogba នឹងមិនបន្ដកុងត្រាជាមួយក្រុមបិសាចក្រហម Manchester United ទៀតនោះទេ បើទោះជាក្លឹបព្យាយាមបញ្ចុះបញ្ចូលយ៉ាងណាក៏ដោយ។ នេះបើតាមសម្ដីរបស់ភ្នាក់ងារទីផ្សារ Mino Raiola។
Pogba ជាកីឡាករដែលក្រុម Manchester United ទិញមកថ្លៃមែនទែន រហូតដល់៨៩លានផោនឯណោះ ប៉ុន្តែរូបគេក៏មានបញ្ហាជាមួយក្លឹបច្រើនដែរកន្លងមកនេះ។ ស្របពេលរដូវកាលនេះ ឱកាសបានលេងមិនទៀងទាត់ទៀត បានធ្វើឱ្យកីឡាករបារាំងសម្រេចចិត្តថានឹងស្វែងរកក្លឹបថ្មីលេងហើយ ដោយចង់ចាកចេញនៅចប់រដូវកាលនេះតែម្ដង។
បើតាមលោក Mino Raiola ភ្នាក់ងារទីផ្សាររបស់ Pogba បាននិយាយថា៖ “គាត់លេងចង់លេងឱ្យ Man Utd ហើយ។ គាត់ដល់ពេលត្រូវប្ដូរក្លឹបថ្មីលេងហើយ ប្ដូរបរិយាកាសថ្មី។ ខ្ញុំយល់ថាជម្រើសល្អបំផុតសម្រាប់គាត់និង Man Utd គឺចាកចេញនៅត្រឹមចប់រដូវកាលនេះ។ គាត់នៅសល់កុងត្រាដល់ឆ្នាំ២០២២។ Man Utd គួរលក់គាត់ចេញ មុនពេលគាត់ដើរចេញដោយគ្មានតម្លៃខ្លួន”៕
ប្រភព៖ DailyMail