មុនឈានដល់ការប្រកួតនៅកីឡដ្ឋាន Camp Nou រាត្រីនេះ អ្នកចាត់ការក្រុមភ្ញៀវលោក Andrea Pirlo បានឆ្លៀតនិយាយដល់ស្ថានភាពរបស់ Lionel Messi ថា បញ្ហាដែលគេកំពុងជួបប្រទះពេលនេះគឺផ្លូវចិត្ត មិនមែនជាការធ្លាក់ទម្រង់លេងអ្វីនោះទេ។
ប្រាប់នៅសន្និសីទសារព័ត៌មានមុនបើកការប្រកួត គ្រូធំសេះបង្កង់និយាយ៖ “Messi កំពុងស្ថិតក្នុងស្ថានភាពបញ្ហាដែលគេជួបប្រទះនៅរដូវក្តៅ មិនទាក់ទងនឹងការលេងក្នុងអាជីពរបស់គេទេ ពោលគឺត្រង់ថាគេគួរបន្តនៅ Barcelona ទៀតឬអត់”។
លោកបន្ត៖ “កំឡុងការប្រកួតគេនៅតែបង្ហាញពីតម្លៃរបស់គេ ហើយលើសពីការលេងបាល់ទាត់ នោះគឺបញ្ហាស្ថិតត្រង់ផ្លូវចិត្តរបស់គេ តែខ្ញុំមិនចង់និយាយស៊ីជម្រៅអ្វីនោះទេ ព្រោះវាគ្មានអ្វីពាក់ព័ន្ធនឹងពួកយើង”។
បញ្ជាក់ថា ការប្រកួតយប់នេះគឺជាការជួបគ្នាសារជាថ្មីរវាងតារាឆ្នើម Cristiano Ronaldo និង Lionel Messi ដែលខកខានប៉ះគ្នាលើទីលានអស់រយៈពេលជាង ២ ឆ្នាំមកហើយ ពោលគឺពេលចុងក្រោយនៅចុងខែឧសភា ឆ្នាំ ២០១៨ គ្រាដែល CR7 នៅឈរជើងឲ្យក្លឹប Real Madrid៕
ប្រភព៖ Marca