Harry Kane បានបំប៉ោងសំណាញ់ទីទល់អតីតក្រុមចាស់កាលនៅជាយុវជនរបស់ខ្លួននោះគឺ Arsenal សម្រាប់ប្រកួតយកឈ្នះ ២-០ កាលពីយប់មិញ។
វាគឺជាគ្រាប់បាល់ទី ២៥០ ហើយរបស់ Kane ក្នុងអាជីពបាល់ទាត់មួយនេះ ដោយមាន ២០២ គ្រាប់ការលេងឲ្យ Spurs ៣២ គ្រាប់នៅជម្រើសជាតិអង់គ្លេស ៩ គ្រាប់នៅ Millwall ៥ គ្រាប់នៅ Leyton Orient និង ២ គ្រាប់នៅ Leicester ហើយវាក៏ជាគ្រាប់បាល់ទី ១០០ ដែរសម្រាប់ការលេងក្នុងទឹកដីម្ចាស់ផ្ទះរបស់ក្លឹប Tottenham។
បញ្ជាក់ថា Kane ធ្លាប់ជាអតីតយុវជនដែល Arsenal បានបោះបង់ ព្រោះកាលនោះគេមានរូបរាងធាត់ខ្លាំងពេក ដែលធ្វើឲ្យកាំភ្លើងធំគិតថាមិនអាចអភិវឌ្ឍគេទៅថ្ងៃខាងមុខបាន ប៉ុន្តែជាក់ស្តែងនៅពេលនេះ Kane កំពុងបង្ហាញថាគេជាកីឡាករលេចធ្លោមួយរូបនៅក្របខ័ណ្ឌ Premier League។
Kane ក៏ជាចំណែកដ៏សំខាន់ដែលទាញឲ្យ Spurs ឡើងមកឈរកំពូលតារាងនៅ Premier League រដូវកាល ២០២០/២១ ហើយវាជាការបោះជំហានសម្រាប់ពានរង្វាន់ដំបូងដែលគេអាចនឹងទទួលបានក្នុងអាជីពរយៈពេលជាច្រើនមកនេះ៕
ប្រភព៖ OptaJoe