Kai Havertz បានទម្លាយកាលពីពេលថ្មីៗនេះថា មិត្តរួមទ្រនំ Timo Werner បានផ្ញើសារមកខ្លួនជារៀងរាល់ថ្ងៃ ក្នុងគោលដៅបញ្ចុះបញ្ចូលឲ្យគេព្រមផ្ទេរមក Chelsea នៅពេលដែល Havertz មិនទាន់សម្រេចចិត្តចាកចេញពីទ្រនំចាស់ Bayer Leverkusen។
ខ្សែប្រយុទ្ធសញ្ជាតិអាល្លឺម៉ង់ Werner បានសម្រេចការផ្ទេរមកចូលរួមនៅ Stamford Bridge នាខែកក្កដា ហើយរហូតមកទល់កញ្ញា ទើប Havertz គេព្រមផ្ទេរមកចូលរួមបន្តដែរ ជាមួយតម្លៃខ្លួន ៧១ លានផោន។
Havertz និយាយថ្មីៗនេះថា៖ “យើង [ខ្លួននិង Werner] ស្គាល់គ្នាច្បាស់នៅជម្រើសជាតិ អ៊ីចឹងគឺជួយបានច្រើនណាស់ ព្រោះពួកយើងជាមិត្តនឹងគ្នាយូរណាស់មកហើយ ហើយក្រោយទទួលបានដំណឹងថា Werner គាត់ប្តូរក្លឹប យើងបានផ្ញើសារជជែកគ្នារាល់ថ្ងៃ”។
លោកបន្ថែម៖ “គាត់តែងតែនិយាយមកខ្ញុំថា មកចូលរួមនៅ Chelsea មក គឺនិយាយបែបហ្នឹងរៀងរាល់ថ្ងៃ ជាក់ស្តែងទៅវាងាយសម្រាប់ខ្ញុំដែរ ការដែលមានកីឡាករអាចនិយាយភាសាអាល្លឺម៉ង់នៅទីនេះបាន ដោយយើងមានដូចជា Timo, Toni Rudiger, Pulisic និង Kovacic ដែលពួកគេអាចនិយាយភាសាអាល្លឺម៉ង់ ហើយជារឿងល្អសម្រាប់ខ្ញុំ តែខ្ញុំក៏អាចនិយាយភាសាអង់គ្លេសបានល្អផងដែរ”៕ប្រភព៖ Metro