នៅថ្ងៃសោរ៍ ទី ៥ ធ្នូ ឆ្នាំ ២០២០ ក្រុមបាល់ទាត់ Cambodian Fan Club All Stars ឬហៅកាត់ CFA បានប្រកាសដាក់លក់ជាលើកដំបូងនូវឈុតកីឡាថ្មីនៃក្រុមរបស់ខ្លួន ហើយជាលទ្ធផលហាក់ទទួលបានផ្លែផ្កានឹកស្មានមិនដល់។
ត្រឹមតែរយៈពេល ៨ ម៉ោងដំបូង ឈុតថ្មីរបស់ក្រុមបាល់ទាត់ដែលមានអាយុកាលជាង ១ ឆ្នាំមួយនេះ លក់ដាច់ដល់ទៅ ១០០ ឈុតឯណោះ។ តាមការបង្ហើបពីអ្នកតំណាងក្រុម CFA លោក អៃ សំអូន បានឲ្យដឹងថា៖ “ការដាក់លក់នេះគឺធ្វើឡើង ដើម្បីឆ្លើយតបទៅនឹងការសំណូមពររបស់ក្រុមអ្នកគាំទ្រ ដែលមានច្រើនគ្នាណាស់ចង់បានឈុត CFA តាំងពីជំនាន់ឈុតចាស់ឆ្នាំទៅមកម្ល៉េះ”។
លោកបន្តទៀតថា៖ “ប៉ុន្តែសម្រាប់ឈុតថ្មីនេះ CFA បើកឲ្យបញ្ជាទិញត្រឹម ១០០ ឈុតប៉ុណ្ណោះ ហើយសម្រាប់អ្នកគាំទ្រដែលចង់បាន អាចរង់ចាំនៅការចេញលក់ពេលក្រោយៗទៀត។ អ្វីដែលពិសេសក្រៅពីទទួលបានឈុតកីឡាដ៏ស្រស់ស្អាត ចំពោះថវិកាដែលចំណាយលើឈុតនោះ ក៏នឹងក្លាយជាចំណែកចូលរួមក្នុងការងារសប្បុរសធម៌ជាមួយក្រុម CFA នៅពេលខាងមុខផងដែរ”។
បញ្ជាក់ថា ឈុតថ្មីរបស់ CFA សម្រាប់ឆ្នាំ ២០២១ គឺមានពណ៌ស ហើយពណ៌ក្រហម លឿង សម្រាប់អ្នកចាំទីឈុត A&B លាយផ្ទៃឆ្នូតពណ៌ខៀវស្រាល អមនឹង Logo ដ៏ស្រស់ស្អាតរបស់ក្រុមហ៊ុនផ្តល់សេវាកម្មកម្សាន្តល្បីឈ្មោះ 2MBET។ ចំពោះតម្លៃក៏ធូរថ្លៃត្រឹមតែ ៤៤ ០០០ រៀល ហើយបងប្អូនអាចដាក់ឈ្មោះ និងលេខដែលខ្លួនស្រលាញ់បានទៀតផង៕