ក្រោយការទទួលមរណភាពរបស់អតីតវីរបុរសលោក Diego Maradona ក្រឡេកទៅជើងចាស់ Ronaldo Nazario បាននិយាយពីរឿងរ៉ាវគួរឲ្យគោរពមួយ ពាក់ព័ន្ធនឹងមូលហេតុដែល Maradona មានពាក់នាឡិកានៅដៃទាំងសងខាង។
អ្នកគាំទ្រខ្លះប្រហែលជាគិតថា Maradona ពាក់ម្តងពីរបែបនោះ ដើម្បីទុកមើលម៉ោងនៅប្រទេសឬតំបន់ ២ ផ្សេងគ្នា ប៉ុន្តែការពិតគឺមិនដូច្នោះទេ។
រឿងនេះត្រូវបានទម្លាយដោយ អតីតខ្សែប្រយុទ្ធនៅក្លឹប Real Madrid បែបនេះថា៖ “ខ្ញុំសួរ Maradona ហេតុអ្វី គាត់ពាក់នាឡិកានៅដៃទាំងពីរ ហើយគាត់និយាយមកវិញ នោះក៏ដោយសារតែវាជាអំណោយរបស់កូនស្រីគាត់ ហើយចាប់តាំងពីពេលនោះមកគាត់ពាក់មិនដែលដោះនោះទេ”។
Ronaldo បន្តទៀតថា៖ “នៅពេលបរិភោគអាហារពេលល្ងាចជាមួយគាត់រួច គាត់ក៏បានដោះនាឡិកាពីដៃម្ខាងមកឲ្យខ្ញុំ ថាចាត់ទុកជាកាដូមកឲ្យខ្ញុំវិញ ដំបូងខ្ញុំមិនចង់ទទួលយកនោះទេ តែបើខ្ញុំមិនយក គាត់នឹងខឹងខ្ញុំហើយ”។
“អ៊ីចឹងមកទល់ពេលនេះ ខ្ញុំនឹងមើលថែនាឡិកានេះឲ្យបានល្អរៀងរហូតទៅ ហើយវាក៏ជាការចងចាំសម្រាប់ទឹកចិត្តរបស់គាត់ ក៏ដូចជាមិត្តភាពរវាងយើងទាំងពីរ”។
បញ្ជាក់ថា ទាំង Ronaldo Nazario និង Diego Maradona សុទ្ធតែស្ថិតក្នុងបញ្ជីកំណត់ត្រាកីឡាករ មានតម្លៃផ្ទេរចេញខ្ពស់បំផុត តួយ៉ាងដូចជា Maradona ធ្លាប់មានតម្លៃផ្ទេរ ចេញ ១២ លានអឺរ៉ូ នៅឆ្នាំ ១៩៨៤ ហើយ Ronaldo កាលពីឆ្នាំ ១៩៩៧ មានតម្លៃផ្ទេរចេញ ២៨ លានអឺរ៉ូ៕
ប្រភព៖ Sportskeeda