• Chelsea ​បើក​ឆាក​រដូវ​កាល​ថ្មី ​ស៊ី​ក្រុម Huddersfield ​ផុយ​ៗ

    ក្រុម​ Chelsea ​បាន​យក​ឈ្នះ​លើ​ក្រុម ​Huddersfield ​៣-០ ​ដើម្បី​យក​៣​ពិន្ទុ​បើក​រដូវ​កាល​ថ្មី​ពាន​រង្វាន់ English Premier League ​កាល​ពី​យប់មិញ​នេះ។

    Chelsea ​ពិត​ជា​លេង​បាន​ល្អ​មែន​ក្នុង​ការ​ប្រកួត​បើក​ឆាក​នេះ ​ដោយ​អាច​រក​បាន​១​គ្រាប់​មុន​ដំបូង​ពី​សំណាក់​កីឡាករ Kante ​ក្រោយ​ទទួល​បាន​បាល់​ពី Willian នៅ​នាទី​៣៤​។ ​នៅ​ចុង​តង់​ទី​១​នេះ​ទៀត​សោត ​ពួកគេ​អាច​រក​បាន​១​គ្រាប់​ទៀត ដោយ Jorginho ​ទាត់​បាល់​ប៉េណាល់ទី​បាន​សម្រេច​នៅ​នាទី​៤៥។

    ការ​ប្រកួត​កាន់​តែ​ក្ដៅ​គគុក​ថែម​ទៀត ​ក្រោយ​ពី​ក្រុម Chelsea ​នាំ​មុខ​២​គ្រាប់​នេះ ​Huddersfield ​ព្យាយាម​ប្រយុទ្ធ​ឡើង​វិញ​ដើម្បី​រក​គ្រាប់។ ផ្ទុយ​ទៅ​វិញ​ការ​សម្រុក​ទៅ​មិន​មាន​ប្រសិទ្ធភាព​ឡើយ ​តែ​បែរ​ជា​ត្រូវ Chelsea ​ថែម​គ្រាប់​ទី​៣ ​ដោយ​ធ្វើ​សម្រេច​ពី Pedro ​ឯ​ណោះ។ ចប់​ការ​ប្រកួត Huddersfield ០-៣ Chelsea ។

    លោក Sarri អ្នក​ចាត់ការ​ក្រុម Chelsea ​ថ្មី ​បាន​និយាយ​ក្រោយ​ចប់​ការប្រកួត​នេះ​ថា​៖ “បើ​យើង​មើល​លទ្ធផល ​អាច​និយាយ​បាន​ថា​យើង​ឈ្នះ​ស្រួល ប៉ុន្តែ​ជាក់​ស្ដែង​ទៅ ការ​ប្រកួត​នេះ​មិន​ស្រួល​នោះ​ទេ។ ក្រុម​គេ​ពិត​ជា​មាន​កាយសម្បទា​ខ្លាំង​ជាង​យើង ដែល​ធ្វើ​ឱ្យ​យើង​ពិបាក​នៅ​ពេល​ចាប់​ផ្ដើម។ នេះ​គ្រាន់​តែ​ប្រកួត​ទី​១ ​យើង​នៅ​មាន​រឿង​ច្រើន​ទៀត​ត្រូវ​ធ្វើ​”៕ប្រភព៖ DailyMail

    ភ្ជាប់ទំនាក់ទំនងជាមួយ CTS SPORT