តុលាការសហភាពអឺរ៉ុប ក្នុងថ្ងៃនេះបានកាត់ក្ដីឲ្យខ្សែប្រយុទ្ធ Lionel Messi ឈ្នះក្នុងការប្រើឈ្មោះត្រកូលខ្លួន ធ្វើជាឈ្មោះ ឬសញ្ញា (Trademark) សំលៀកបំពាក់ និងសម្ភារៈកីឡា។នេះគឺជាជ័យជំនះមួយសម្រាប់ខ្សែប្រយុទ្ធអាហ្សង់ទីន ក្រោយបានធ្វើការប្ដឹងអស់ពេលជាង ៧ឆ្នាំ។ កីឡាករបានស្នើទៅការិយាល័យកម្មសិទ្ធិបញ្ញាសហភាពអឺរ៉ុប ក្នុងការទាមទារយកសិទ្ធិផ្ដាច់មុខដើម្បីដាក់ត្រកូលខ្លួន “Messi” ធ្វើជាឈ្មោះផលិតផលសម្ភារៈកីឡា និងសំលៀកបំពាក់ កាលពីឆ្នាំ ២០១១។
កាលនោះ ក្រុមហ៊ុនអេស្ប៉ាញមួយដែលផលិតសម្ភារៈនៃកីឡាជិះកង់ឈ្មោះថា “Massi” បានឡាំប៉ាទៅកាន់ការិយាល័យនោះ ដោយលើកឡើងថា ឈ្មោះ “Messi” មានលក្ខណៈស្រដៀងខ្លាំងពេកទៅនឹងឈ្មោះក្រុមហ៊ុនខ្លួន ដែលនេះនឹងបណ្ដាលឲ្យមានភាពភ័ន្តច្រឡំនានាកើតឡើង។ ការិយាល័យកម្មសិទ្ធិបញ្ញាបានយល់ស្របនឹងក្រុមហ៊ុន Massi។ ខ្សែប្រយុទ្ធ Messi ក៏ដាក់ពាក្យប្ដឹងតែម្ដង។
ចំពោះហេតុផលដែលនៅពីក្រោយការកាត់ក្ដីឲ្យ Messi ឈ្នះ តុលាការសហភាពអឺរ៉ុបបានលើកឡើងថា កីឡាករអាហ្សង់ទីន គឺជាបុគ្គលសាធារណៈដែលត្រូវបានគេឯងស្គាល់ជាទូទៅ។ ឈ្មោះរបស់ខ្សែប្រយុទ្ធត្រូវបានជាប្រធានបទដែលគេយកទៅនិយាយនៅតាមប៉ុស្តិ៍ទូរទស្សន៍ និងវិទ្យុ។
ដូច្នេះវាជារឿងខុស ដែលសន្និដ្ឋានថាឈ្មោះ Messi នឹងបង្កឲ្យមានការភ័ន្តច្រឡំទៅនឹងឈ្មោះក្រុមហ៊ុនណាមួយនោះ។ការផ្ដល់សិទ្ធិនេះ នឹងធ្វើ Lionel Messi ចូលរួមជាមួយ Cristiano Ronaldo (CR7) ក្នុងនាមជាកីឡាករបាល់ទាត់ដែលប្រើប្រាស់នាមត្រកូលរបស់ខ្លួនធ្វើជាឈ្មោះផលិតផល។ ការណ៍នេះត្រូវបានគេរំពឹងទុកថា នឹងធ្វើឲ្យទ្រព្យសម្បត្តិផ្ទាល់ខ្លួនរបស់កីឡាករអាហ្សង់ទីនកើនមួយកម្រិតទៀត។
កាលពីប៉ុន្មានថ្ងៃមុន L’Equipe បានចុះផ្សាយថា Messi ជាកីឡាករបាល់ទាត់កំពុងរកលុយច្រើនបំផុតនាពេលបច្ចុប្បន្ន (ជិត ១៥៤ លានដុល្លារសហរដ្ឋអាមេរិកក្នុងមួយឆ្នាំ) ខណៈ Ronaldo ឈរលេខ ២ (ជិត ១១៥លានដុល្លារសហរដ្ឋអាមេរិកក្នុងមួយឆ្នាំ)៕
