Manuel Pellegrini អ្នកចាត់ការក្រុម West Ham និយាយថាកីឡាករចាស់ៗនៅក្លឹបពិតជាពិបាកនឹងធ្វើឱ្យពួកគេសប្បាយចិត្តណាស់ ព្រោះវត្តមានកីឡាករថ្មីចូលក្រុមច្រើនពេក។
West Ham នាំចូលកីឡាករ១០នាក់នៅរដូវកាលដោះដូរកីឡាករនេះ រួមទាំងកីឡាករ Felipe Anderson ដែលបំបែកកំណត់ត្រាក្លឹប៤០លានផោនថែមទៀត។ ការចំណាយច្រើន និងមានកីឡាករថ្មីច្រើននេះ បានបង្កើតជាបញ្ហាសម្រាប់លោក Pellegrini ព្រោះអ្នកចាត់ការរូបនេះដឹងថាកីឡាករចាស់ៗនៅក្នុងក្រុមពិតជាមិនសប្បាយចិត្តនោះទេ។
អតីតអ្នកចាត់ការក្រុម Man City ខាងលើបាននិយាយទៀតថាលោកមក West Ham ដើម្បីផ្លាស់ប្ដូរ ការទិញចូលកីឡាករថ្មីនិងរៀបទម្រង់ថ្មី នឹងធ្វើឱ្យប៉ះពាល់ដល់កីឡាករខ្លះ។ យ៉ាងណាមិញ លោកដឹងមុនហើយថា នឹងមានរឿងនេះ ប៉ុន្តែបាល់ទាត់ត្រូវតែមានការផ្លាស់ប្ដូរ។ ការប្រកួតទល់ក្រុម Liverpool នៅថ្ងៃអាទិត្យនេះ លោកនឹងសម្រេចចិត្តចំពោះកីឡាករណាដែលត្រូវជាប់ជម្រើស១១នាក់ដំបូង។
West Ham បានចំណាយអស់៩៥លានផោន ដើម្បីនាំយកកីឡាករចំណូលថ្មី១០នាក់។ ក្លឹបមួយនេះ រំពឹងថានឹងទទួលបានចំណាត់ថ្នាក់ល្អនៅរដូវកាលនេះ៕ប្រភព៖ DailyMail
