Kevin-Prince Boateng បានទម្លាយថាលោកមានអារម្មណ៍ដូចជាខ្វះខាតអ្វីម្យ៉ាង នៅពេលដែលលោកឃើញ Lionel Messi ហ្វឹកហាត់ ហើយរហូតដល់ថ្នាក់ចង់ឲ្យលោកបញ្ចប់អាជីពពីវិស័យកីឡាបាល់ទាត់ទៀតផង។
Baoteng បានចំណាយពេល ៦ ខែនៅក្លឹប Barcelona សម្រាប់លក្ខខណ្ឌខ្ចីជើងកាលពីឆ្នាំ ២០១៩ ហើយបើទោះបីគេមានឱកាសចូលរួមការប្រកួតតែ ៥ លើកក៏ដោយ ប៉ុន្តែបុរសសញ្ជាតិអាល្លឺម៉ង់បាន សរសើរមិនដាច់ពីមាត់នូវពេលបានលេងជាមួយតារាឆ្នើម Messi។
ប្រាប់សារព័ត៌មាន DAZN កីឡាករវ័យ ៣៣ ឆ្នាំនិយាយថា៖ “រយៈពេល ៦ ខែនៅ Barcelona គឺអស្ចារ្យខ្លាំង ដោយដំបូងខ្ញុំមិនជឿទេថា Barcelona ចង់បានខ្ញុំ”។
លោកបន្ថែមទៀតថា៖ “នៅពេលហ្វឹកហាត់ជាមួយ Messi ធ្វើឲ្យខ្ញុំនិយាយលែងចង់ចេញ ដោយខ្ញុំតែងតែនិយាយថា Cristiano Ronaldo ល្អបំផុតក្នុងលោក តែ Messi គឺជាអ្វីមួយផ្សេងទៀត ដែលមិនមែនជាមនុស្សធម្មតាឡើយ”។
“កំឡុងពេលហ្វឹកហាត់ជាមួយគាត់ ខ្ញុំមានអារម្មណ៍ថាខ្លួនឯងនៅខ្វះខាតច្រើន ហើយវាជាលើកទីមួយក្នុងអាជីពដែលខ្ញុំគិតបែបហ្នឹង រហូតដល់មានអារម្មណ៍ថា វាដល់ពេលហើយសម្រាប់ខ្ញុំដែលត្រូវឈប់លេងបាល់ទាត់”។
បញ្ជាក់ថា Boateng បច្ចុប្បន្នកំពុងលេងឲ្យក្លឹបនៅ Serie B គឺ AC Monza ដែលគេផ្ទេរទៅចូលរួមកាលពីថ្ងៃទី ២៨ កញ្ញា ឆ្នាំ ២០២០ ក្រោយរួមរស់នៅ Fiorentina បានជាង ១ ឆ្នាំ៕ ប្រភព៖ SportBible