លោក Toni Freixa បេក្ខភាពឈានមុខក្នុងការក្លាយជាប្រធានក្លឹប FC Barcelona ថ្មីនៅឆ្នាំក្រោយនេះ បានអះអាងថាលោកនឹងមិនទិញ Neymar ត្រលប់មកវិញឡើយ។
Neymar បានចាកចេញពីក្រុមអ្នកមានបុណ្យទៅចូលរួមជាមួយក្រុម PSG កាលពីឆ្នាំ២០១៧កន្លងទៅ ក្នុងតម្លៃខ្លួនខ្ពស់បំផុតមួយ។ យ៉ាងណាមិញ មួយរយៈចុងក្រោយនេះ ក៏ស្រាប់តែមានដំណឹងថារូបគេមានចិត្តចង់ត្រលប់មករួមរស់ជាមួយក្រុម Barcelona វិញហើយ ក្រោយពីទៅលេងនៅបារាំងនោះមិនអាចលើកពានរង្វាន់ UEFA Champions League បាន។
អមជាមួយដំណឹងនៃការចង់ត្រលប់មកវិញនេះដែរ លោក Toni Freixa បេក្ខភាពអនាគតប្រធានក្លឹប Barcelona ក៏បានចេញមុខមកបញ្ជាក់ថា៖ “Neymar ព្រោះតែទម្រង់លេងរបស់គាត់បច្ចុប្បន្ននេះ មិនជាប់សូម្បីបញ្ជីកីឡាករល្អទាំង៣០នាក់ផង។ ប្រសិនបើខ្ញុំជាប្រធានក្លឹប ខ្ញុំនឹងមិនទិញគាត់មកវិញនោះទេ”៕ប្រភព Dailymail
