យុវជន Takefusa Kubo បានត្រៀមខ្លួនរួចរាល់នឹងចាកចេញពីក្លឹប Villarreal ហើយត្រលប់មកចូលរួមនៅក្លឹបអាណាព្យាបាល Real Madrid នៅទីផ្សារដោះដូរនាខែមករា ឆ្នាំ ២០២១ ខាងមុខ។ នេះបើតាមរបាយការណ៍ពី El Periodio Mediterraneo បានចុះផ្សាយ។
កីឡាករវ័យ ១៩ ឆ្នាំ ធ្លាប់បានទៅចូលរួមនៅ Real Mallorca ម្តងរួចមកហើយនៅរដូវកាលចាស់ មុនផ្ទេរមក Villarreal ដែលជាក្លឹបខ្ចីជើងទី ២ របស់គេ ប៉ុន្តែដោយសារនៅទីនោះមិនសូវបានលេង ទើបគេសម្រេចចិត្តចង់ត្រលប់មកទឹកដីក្លឹបអាណាព្យាបាលវិញ។
Kubo បានជាប់នៅជម្រើសដំបូងតែមួយលើកគត់ជាមួយ Villarreal ចាប់តាំងពីការផ្ទេរច្រើនខែមកនេះ ហើយនៅ Europa League បាន ៣ លើក។ សរុបរយៈពេលឈរជើង គេទើបបានទទួលពេលវេលាលើទីលានត្រឹម ៤២៧ នាទីប៉ុណ្ណោះ ដោយរកបាន ១ គ្រាប់និង Assist ៣ លើក។
គួរបញ្ជាក់ថា កុងត្រារបស់ Kubo ជាមួយ Real Madrid គឺត្រូវផុតនៅឆ្នាំ ២០២៤ ហើយហាងឆេងថ្លៃខ្លួនរបស់គេថ្លៃប្រមាណ ៣០ លានអឺរ៉ូ៕ ប្រភព៖ Goal