ម៉ាស៊ីនស៊ុត Zlatan Ibrahimovic ដែលកំពុងឈរជា Top Scorer នៅក្របខ័ណ្ឌ Serie A ត្រូវគេរាយការណ៍ថាបានជួបបញ្ហារបួសសរសៃពួរកំឡុងការប្រកួត ទល់ Napoli កាលពីថ្ងៃមុន ហើយលោកនឹងត្រូវក្លឹបដាក់ឲ្យសម្រាកព្យាបាលមួយរយៈពេលសិន។
ខ្សែប្រយុទ្ធស៊ុយអែតធ្វើបានយ៉ាងល្អ ចាប់តាំងពីការផ្ទេរមកចូលរួមនៅ AC Milan សារជាថ្មី ហើយជាចំណែកដ៏សំខាន់ដែលជួយក្លឹបឈរនៅកំពូលតារាងក្នុងពេលបច្ចុប្បន្ន។ ដើម្បីបញ្ចៀសការខកខានចូលរួមប្រកួតសំខាន់នៅចុងឆ្នាំ គឺការប៉ះ Lazio នៅថ្ងៃទី ២៣ ធ្នូ និងប៉ះ Juventus នៅថ្ងៃទី ៦ មករា ក្លឹប Milan ក៏សម្រេចដក Zlatan ឲ្យសម្រាកព្យាបាលរបួសឲ្យបានស្រួលសិនក្នុងកំឡុងពេលនេះ។
បែបនេះមានន័យថា ខ្ញីចាស់សញ្ជាតិស៊ុយអែតនឹងមិនអាចជួយក្រុមប៉ះ Lille និង Celtic នៅការប្រកួត Europa League ខាងមុខនោះទេ ពោលគឺទាមទាររយៈពេលច្រើនជាង ១០ ថ្ងៃសម្រាប់ព្យាបាលរបួសខាងលើ។
បញ្ជាក់ថា ប្រសិន Milan អាចយកឈ្នះក្លឹបខ្លាំងទាំងពីរមាន Lazio និង Juventus ទៀតនោះ ពួកគេក៏សង្ឃឹមច្រើនក្នុងការលើកពាន Serie A រដូវកាលនេះផងដែរ។ គិតត្រឹមជុំទី ៨ ក្លឹបដឹកនាំដោយលោក Stefano Pioli មាន ២០ ពិន្ទុ យកឈ្នះ ២ ពិន្ទុធៀបនឹងក្រុម Sassuolo ដែលឈរលេខ ២៕
ប្រភព៖ Marca