នៅជម្រើសជាតិបាល់ទះផ្នែកនារី របស់កូរ៉េខាងត្បូង ក្នុងចំណោមសមាជិកទាំង ១៥ រូប ក៏ជឿថាមានអ្នកគាំទ្រភាគច្រើនប្រាកដជាស្គាល់នូវបងប្អូនភ្លោះមានឈ្មោះ Lee Jae-yeong និង Lee Da-yeong។
ក្រៅពីទេពកោសល្យដ៏ប៉ិនប្រសព្វជាមួយវិស័យកីឡាបាល់ទះ អ្នកទាំងពីរក៏មានសម្រស់ស្រស់ស្អាត លាយឡំនឹងភាពក្រមិចក្រមើម ហើយបានឆក់យកបេះដូងអ្នកគាំទ្រវិស័យកីឡាបាល់ទះ ជាពិសេសគឺបុរសៗរាប់លាននាក់នៅទូទាំងសកលលោក។ តើកីឡាការនីនៅជម្រើសជាតិទាំងពីររូបខាងលើ បានហែលកាត់ប្រវត្តិការលេងឲ្យក្លឹប និងជម្រើសជាតិជោគជ័យបែបណាខ្លះ តោះទៅតាមដានជាមួយទំព័រ CTS Sports ដូចតទៅ៖
Lee Da-yeong និង Lee Jae-yeong ជាបងប្អូនភ្លោះកើតនៅថ្ងៃទី ១៥ តុលា ឆ្នាំ ១៩៩៦ មានឪពុកឈ្មោះ Lee Ju-hyung និងម្តាយឈ្មោះ Kim Gyeong-hui។ ម្តាយរបស់ពួកនាងធ្លាប់ជាអតីតកីឡាការនីនៅក្រុមជម្រើសជាតិបាល់ទះប្រចាំផ្ទៃប្រទេស ហើយធ្លាប់ជាសមាជិកចូលរួមការប្រកួតនៅកីឡាអូឡាំពិករដូវក្តៅឆ្នាំ ១៩៨៨។
ក្រឡេកទៅ Lee Da-yeong ដែលមានអាយុ ២៤ ឆ្នាំ កម្ពស់ ១,៧៩ ម៉ែត្រ ទម្ងន់ ៦២ គីឡូក្រាម លេងនៅតួនាទីជា អ្នកលើកបាល់។ នាងបានចាប់ផ្តើមអាជីពនៅជម្រើសជាតិកូរ៉េខាងត្បូងក្នុងឆ្នាំ ២០១២ ខណៈការលេងឲ្យក្លឹបបានចូលរួមនៅឆ្នាំ ២០១៤ ជាមួយក្លឹប Suwon Hyundai Engineering&Constructionn Hillstate ហើយ ៦ ឆ្នាំបន្ទាប់នៅឆ្នាំ ២០២០ បានផ្ទេរមកចូលរួមនៅក្លឹប Incheon Heungkuk Life Pink Spiders ក្នុងក្របខ័ណ្ឌកំពូល V-League។
Da-Yeong ធ្លាប់ឈ្នះមេដាយជាច្រើនគ្រឿងនៅការលេងឲ្យជម្រើសជាតិ ហើយសម្រាប់ក្លឹប នាងធ្លាប់ជាចំណែកជួយឲ្យក្រុមដំបូងរបស់នាង ឈ្នះជើងឯក Korean V-League នៅរដូវកាល ២០១៥/១៦ ទៀតផង។
បង្វែរទៅ Lee Jae-yeong ឯណោះវិញ មានកម្ពស់ ១,៧៩ ម៉ែត្រ ទម្ងន់ ៦៣ គីឡូក្រាម លេងនៅនាទីជា ស្មាត់ក្រៅប្រអប់។ នាងបានចូលរួមជាមួយជម្រើសជាតិនៅឆ្នាំ ២០១៣ ហើយប្រលូកការលេងឲ្យក្លឹបនៅឆ្នាំបន្ទាប់ ២០១៤ ប៉ុន្តែស្ម័គ្រស្មោះនៅក្លឹបទោល Incheon Heunghuk Life Pink Spiders មកទល់សព្វថ្ងៃ ដែលជាទ្រនំរួមគ្នាជាមួយបងប្អូនបង្កើតខ្លួន។ នៅរដូវកាល ២០១៤/១៥ នាងក៏ជាចំណែកដ៏សំខាន់ ដែលជួយឲ្យក្លឹបឈរនៅចំណាត់ថ្នាក់ទី ៤ ក្នុងក្របខ័ណ្ឌ Korean V-League។
នៅជម្រើសជាតិអ្នកទាំងពីរធ្លាប់ជាចំណែករួមគ្នា ដែលបានជួយក្រុមកូរ៉េខាងត្បូងឈ្នះមេដាយមាសនៅព្រឹត្តិការណ៍ស៊ីហ្គេម ក្នុងទីក្រុង Incheon ឆ្នាំ ២០១៤ និងមេដាយសម្រិតក្នុងទីក្រុង Jakarta និង Palembang ឆ្នាំ ២០១៨។ ក្រៅពីនេះក៏មានជោគជ័យនៅព្រឹត្តិការណ៍ធំៗផ្សេងទៀតដូចជា Asian Women’s Volleyball Championship, Asian Cup Championship និង Asian Women’s U19 Volleyball Championship ក្នុងទីក្រុងតៃប៉ិផងដែរ៕
ប្រភព៖ Wikipedia