(វីដេអូ) គេ​ទូទៅ​ប្រើ​ជើង​ផ្តាច់​បាល់ តែ​អ្នកចាំទី​ស៊ីរី​ប្រើ​ដៃ​គប់​ផ្តាច់​បាន​ឆ្ងាយ​មិន​គួរ​ឲ្យ​ជឿ

នៅ​ក្នុង​ប្រអប់​របស់​អ្នកចាំទី​ដែល​មាន​ចម្ងាយ ១៨ យ៉ាត​ឬ​ជាង ១៦,៥ ម៉ែត្រ ជា​ទូទៅ​នៅ​ពេល​ដែល​ចង់​ផ្តាច់​បាល់​ចេញ ប្រសិន​ស្ថិត​នៅ​ចម្ងាយ​ជិត​ល្មម​គឺ​ពួក​គេ​រមែង​ប្រើ​ដៃ​ដើម្បី​គប់​បាល់​នោះ​ទៅ​ឲ្យ​មិត្ត​រួម​ក្រុម ប៉ុន្តែ​បើ​ចង់​ផ្តាច់​ទៅ​គោលដៅ​ឆ្ងាយ​គឺ​ប្រើប្រាស់​ជើង​ដើម្បី​ទាត់​ផ្តាច់។

ចម្លែក​អី​តែ​អ្នកចាំទី​របស់​ក្រុម​ជម្រើស​ជាតិ​ស៊ីរី ឈ្មោះ Ibrahim Alma បែរ​ជា​ទម្លាប់​ប្រើប្រាស់​ដៃ​សុទ្ធ​សាធ​ទៅ​វិញ មិន​ថា​តែ​ការ​ផ្តាច់​បាល់​នៅ​រយៈ​ចម្ងាយ​ជិត​ឬ​ឆ្ងាយ​នោះ​ទេ។ Alma ​បាន​ចាយ​ពេល​ក្នុង​អាជីព​បាល់ទាត់​ជិត ១០ ឆ្នាំ​មក​ហើយ ដោយ​ឆ្លងកាត់​ការ​លេង​ឲ្យ​ក្លឹប​កំពូល​ធំៗ ៣ នៅ​លីគ Syrian Premier League និង​ផ្តើម​ចូលរួម​នៅ​ជម្រើស​ជាតិ​ចាប់​តាំង​ពី​ឆ្នាំ ២០១២។

បុរស​វ័យ ២៩ ឆ្នាំ​បាន​បង្ហាញ​ទេពកោសល្យ​របស់​ខ្លួន​ជា​លើក​ដំបូង នៅ​កំឡុង​ការ​ប្រកួត​កាល​ពី​ឆ្នាំ ២០១៨ ពេល​ស៊ីរី លេង​តទល់​ក្រុម​សាំរ៉ៃ​ខៀវ​ជប៉ុន។ កាល​នោះ Alma បាន​ប្រើ​ដៃ​វ៉ៃ​បាល់​ផ្ដាច់​ចេញ​ពី​ប្រអប់​អ្នកចាំទី ទៅ​កាន់​មិត្ត​រួម​ក្រុម​នៅ​ចម្ងាយ​ដ៏​ឆ្ងាយ ដែល​សមត្ថភាព​បែប​នេះ​មិន​មែន​សុទ្ធ​តែ​អ្នកចាំទី​រាល់​គ្នា​អាច​ធ្វើ​បាន​នោះ​ទេ កុំ​ថា​ឡើយ​អ្នកចាំទី​នៅ​លីគ​កំពូល​ក្នុង​ក្របខ័ណ្ឌ​អឺរ៉ុប។

ទស្សនា​វីដេអូ​ខាង​ក្រោម៖

ចាប់​តាំង​ពី​ពេល​នោះ​មក​លោក​រមែង​ប្រើប្រាស់​តិចនិក​ពិសេស​មួយ​នេះ ​មិន​ថា​តែ​ការ​ប្រកួត​នៅ​ក្លឹប​ឬ​ជម្រើស​ជាតិ ហើយ​បាន​ធ្វើ​ឲ្យ​អ្នក​គាំទ្រ​មាន​ការ​ស្ងើច​សរសើរ​និង​ចាប់​អារម្មណ៍​ជា​ខ្លាំង រហូត​ដល់​អ្នក​គាំទ្រ​នៅ​ស៊ីរី​ខ្លះ បង្ហាញ​ពី​មោទនភាព​ដែល​មាន​អ្នកចាំទី​មាន​ទេពកោសល្យ​ពិសេស​ដូច​ជា Alma ទៀត​ផង៕

 

ភ្ជាប់ទំនាក់ទំនងជាមួយ CTS SPORT