លោក Pep Guardiola បានសម្រេចបន្ដកុងត្រានៅក្រុម Manchester City រហូតដល់២ឆ្នាំទៀតហើយ ដែលធ្វើឱ្យអ្នកគាំទ្រសប្បាយចិត្តជាខ្លាំង។
ការសប្បាយចិត្តនេះ មិនត្រឹមតែបន្ដកុងត្រាដល់ឆ្នាំ២០២៣ទេ អ្នកគាំទ្រក្រុម Man City ក៏មានទំនុកចិត្តក្នុងការយក Lionel Messi មកអង់គ្លេសបានដែរ។ Messi នៅសល់កុងត្រាត្រឹមចប់រដូវកាលនេះប៉ុណ្ណោះ ហើយខែមករាខាងមុខនេះ គេទំនងជានឹងឃើញមានក្លឹបដើម្បីចូលទៅចរចាយកកីឡាករឆ្នើមរបស់ក្រុមអ្នកមានបុណ្យម្នាក់នេះហើយ។ ព្រោះមានតែលក់នៅខែមករាទេ ទើបក្រុម Barcelona អាចដាក់តម្លៃខ្លួនបាន ប្រសិនបើទុកដល់ដាច់រដូវកាលនេះហើយមិនមានកុងត្រាថ្មីទេ គឺមានន័យថាMessi អាចដើរចេញដោយគ្មានតម្លៃខ្លួនហើយ។
រំលឹកថា Pep និង Messi មានទំនាក់ទំនងល្អកាលគ្រាដែលពួកគេធ្វើការជាមួយគ្នានៅក្រុម FC Barcelona ។ ដោយសារតែមានភាពស្និទ្ធស្នាលគ្នានេះហើយ ទើបបានជាក្លឹប Man City មានទំនុកចិត្តថាបើ Messi នោះមានតែ Man City មួយទេ ជាជម្រើសទី១របស់គេ៕
ប្រភព៖ DailyMail