ក្រុមជម្រើសជាតិអាហ្សង់ទីន និងប្រេស៊ីល សុទ្ធតែបន្ដកំណត់ត្រាមិនចាញ់ឡើយ ក្នុងការប្រកួតជម្រុះ World Cup 2022 នៅទ្វីបអាមេរិកខាងត្បូង។នៅព្រឹកមិញនេះ ក្រុមប្រេស៊ីល បានបន្ដភាពខ្លាំងរបស់ខ្លួន ដោយយកឈ្នះលើក្រុមអ៊ុយរុយហ្គាយក្នុងលទ្ធផល ២-០ បើទោះជាពួកគេអវត្តមានកីឡាករសំខាន់ៗដូចជា Coutinho និង Neymar ក៏ដោយ។
២គ្រាប់របស់ក្រុមសាំបាខាងលើនេះ ធ្វើបានសម្រេចដោយ Arthur ១គ្រាប់នៅនាទី៣៤ និង Richarlison នៅនាទី៤៥។ ទទួលបានលទ្ធផល៣ពិន្ទុនេះ ធ្វើឱ្យក្រុមប្រេស៊ីលបន្ដឈរនៅកំពូលតារាង លេង៤ប្រកួត ឈ្នះទាំង៤ប្រកួត។
សម្រាប់ក្រុមអាហ្សង់ទីនវិញ ក៏បង្ហាញទម្រង់លេងល្អផងដែរ។ ពួកគេបានយកឈ្នះលើក្រុមបេរ៉ូក្នុងលទ្ធផល ២-០ ដែរ។ ដោយ២គ្រាប់នោះធ្វើបានដោយ Nicolas Gonzalez នាទី១៧ និង Lautaro Martinez នៅនាទី២៨។ ជ័យជម្នះនេះ គឺជាជ័យជម្នះទី៣ក្នុងការប្រកួត៤ប្រកួតកន្លងមកនេះរបស់អាហ្សង់ទីន ដោយឈរនៅចំណាត់ថ្នាក់លេខ២ ក្រោមប្រេស៊ីល៕
ប្រភព៖ Goal