ក្លឹបនៅលីគលំដាប់ទីពីររបស់អង់គ្លេសគឺ Derby County បានសម្រេចជ្រើសរើសឈ្មោះ Wayne Rooney ឲ្យឡើងមកធ្វើជាគ្រូបង្វឹកបណ្តោះអាសន្នសម្រាប់ការប្រកួតនៅចុងសប្តាហ៍នេះ បន្ទាប់ពីក្លឹបប្រកាសបណ្តេញចោលអ្នកចាត់ការលោក Phillip Cocu ពីតំណែងគ្រូបង្គោល។
លោក Phillip ដឹកនាំឲ្យ County ទទួលរងបរាជ័យជាបន្តបន្ទាប់ ក្រោយផ្លាស់មកកាន់តំណែងជំនួសលោក Frank Lampard នៅឆ្នាំ ២០១៩។ មកទល់ពេលនេះ Derby ឈរបាតតារាងមានតែ ៦ ពិន្ទុប៉ុណ្ណោះក្នុងដៃ។
Rooney នឹងប្រើប្រាស់សិទ្ធពិសេសដឹកនាំក្រុមរបស់ខ្លួន អមជាមួយអតីតកីឡាករនៅ Hull City/Brighton គឺ Liam Rosenior។ ដោយឡែកអ្នកដែលត្រូវឡើងមកកាន់តំណែងពេញសិទ្ធជានរណានោះ ក្លឹបមិនទាន់អាចប្រកាសពេលនេះបាននៅឡើយ។
តាមចចាមអារ៉ាមដោយរង់ចាំការចរចាលើកិច្ចព្រមព្រៀងទទួលប្រធានក្លឹបថ្មី ដែលជាបងប្អូនជីដូនមួយរបស់សេដ្ឋីក្លឹប Man City លោក Sheikh Mansour រួចរាល់ហើយសិន ទើបប្រកាសពីអ្នកចាត់ការថ្មីបាន៕
ប្រភព៖ BeSoccer