អតីតនាយកគ្រប់គ្រងផ្នែកកីឡារបស់ក្លឹប Barcelona គឺលោក Javier Bordas បានទម្លាយកាលពីពេលថ្មីៗនេះថា ក្លឹបយក្សកាតាឡាន់តាមថាត្រូវយកបាន Kylian Mbappe មិនមែន Ousmane Dembele ទេនៅឆ្នាំ ២០១៧។
បង្វែរទៅ ៣ ឆ្នាំមុន Barcelona បានចាយលុយធំ ១៣៥,៥ លានផោន នាំយក Dembele ចេញពី Dortmund ដែលឆ្លើយតបទៅនឹងការចាកចេញរបស់ Neymar ដែលក្លឹបប្រមូលបាន ២០០ លានផោនពីការលក់ឲ្យ PSG។
ជជែកប្រាប់ Mundo Deportivo អតីតនាយកជាន់ខ្ពស់ Barca ខាងលើ បានពន្យល់ពីដើមចមដែលធ្វើក្លឹបខកខានឱកាសនាំយក Mbappe ដូច្នោះថា៖ “ខ្ញុំបានតេទៅឪពុក Mbappe ហើយ គាត់ក៏ប្រាប់ខ្ញុំដែរថារឿងទៅ Real Madrid គឺមិនអាចទេ ព្រោះមាន Ronaldo,Benzema, Bale នៅទីនោះហើយ តែគេនឹងទៅ Barca ព្រោះ Neymar បានចាកចេញ”។
លោកបន្ថែម៖ “មួយផ្សេងទៀតប្រធានក្លឹប Monaco ក៏ចង់ឲ្យ Mbappe មកយើង ជាងឲ្យទៅ PSG ដែរ ដោយយើងមានជម្រើសរវាងការទិញយក Mbappe សម្រាប់តម្លៃ ១០០ លានអឺរ៉ូ កំឡុងពេលដែលយើងកំពុងពិចារណាលើការយក Dembele ហើយចម្លើយនៃការជ្រើសរើសគឺដោយសារកាលនោះយើងទទួលបានការពន្យល់ថា Mbappe គេលេងឯករាជ្យតែឯកឯង ហើយ Dembele គេលេងជាក្រុម”។
លោកសង្កត់ធ្ងន់៖ “ក្រៅពីនោះខ្ញុំក៏ធ្លាប់ណែនាំកីឡាករល្អៗជាច្រើនឲ្យក្លឹប Barca ដែរ ដូចជា Haaland, Ferran Torres, Dani Olma ជាដើម កាលនោះពួកគេតម្លៃតែ ២០ លានអឺរ៉ូអីទេ”៕
ប្រភព៖ Sportskeeda