ខ្សែបម្រើរបស់ក្លឹបមេឃខៀវ Manchester City គឺកីឡាករ Kevin de Bruyne ថ្មីៗនេះបានបង្ហើបថា ខ្លួនកំពុងស្ថិតក្នុងការជជែកលើការបន្តកុងត្រាថ្មីជាមួយក្លឹប ហើយបានបង្ហាញពីភាពសប្បាយរីករាយក្នុងការបន្តឈរជើងនៅទឹកដីអង់គ្លេស។
បុរសសញ្ជាតិបែលហ្សិកបានក្លាយជាកីឡាករដ៏សំខាន់ ក្រោមការដឹកនាំរបស់លោក Pep Guardiola នៅរយៈពេលប៉ុន្មានឆ្នាំចុងក្រោយ ហើយសុពលភាពកុងត្រារបស់គេគឺត្រូវផុតនៅឆ្នាំ ២០២៣ ឯណោះ តែការបន្តកុងត្រាថ្មីឲ្យលើសកាលបរិច្ឆេទនោះ សម្រាប់លោកហាក់មិនសូវរារែកឡើយ។
ជជែកប្រាប់សារព័ត៌មាន VTM Nieuws កីឡាករវ័យ ២៩ ឆ្នាំនិយាយ៖ “ខ្ញុំកំពុងរីករាយនៅ Manchester ហើយខ្ញុំស្ថិតនៅក្លឹបនិងប្រធានក្លឹបដ៏ល្អមួយ”។
លោកសង្កត់ធ្ងន់៖ “យើងបានស្ថិតក្នុងការចរចាមួយដែរ តែមិនប្រញាប់ពេកនោះទេ ដោយពេលនេះខ្ញុំកំពុងសួរនាំខ្លួនឯង ដោយត្រង់ថាបើខ្ញុំចង់បន្តគឺងាយទេ ហើយប្រសិនមិនបន្តនៅ នោះនឹងមានគេមកជំនួស តែការសម្រេចចិត្តបន្ត គឺវាមិនពិបាកពេកនោះទេ”៕
ប្រភព៖ Sportsmole