Cristiano Ronaldo នឹងរំកិលឡើងមួយលេខទៀត ពោលគឺចូលអាយុ ៣៦ ឆ្នាំនៅខែកុម្ភៈ ឆ្នាំ ២០២១ ខាងមុខ។ ប៉ុន្តែបើទោះបីជាអាយុរាងក្រាស់ហើយក្តី តែការលេងរបស់កីឡាករព័រទុយហ្គាល់នៅតែខ្លាំង មិនចាញ់កីឡាករអាយុស្រករ ២០ នោះឡើយ។
ពាក់ព័ន្ធនឹងរឿងរ៉ាវនេះ អតីតគ្រូបង្វឹកផ្នែកកាយសម្បទានៅក្លឹប Manchester United គឺលោក Mick Clegg បានបង្ហាញការយល់ឃើញពីពេលវេលាដែល CR7 អាចនឹងចូលនិវត្ត ដោយធៀបទៅនឹងសម័យកាលរបស់ជើងចាស់លោក Ryan Giggs។
ប្រាប់សារព័ត៌មាន Gazzetta dello Sport លោក Clegg និយាយថា៖ “មុនពេលមាន Ronaldo ដូចពេលបច្ចុប្បន្ននេះ កាលពីអតីតកាលអត្តពលិកដែលលុតដំខ្លួនឯងខ្លាំងបំផុតលើផ្នែកកាយសម្បទានោះគឺ Ryan Giggs ដោយកាលនោះគឺគាត់រឹងមាំខ្លាំងណាស់”។
លោកបន្តទៀតថា៖ “ប្រសិន Giggs អាចឈរជើងនៅ United ដល់គាត់មានអាយុ ៤០ ឆ្នាំបាន បែបហ្នឹង Ronaldo ក៏អាចឈរជើងដល់អាយុ ៤១ ឆ្នាំបានដែរ ពោលគឺមានតែ Cristiano ទេ ដែលអាចឆ្លងហួសកម្រិតស្តង់ដារដ៏ខ្ពស់របស់ Giggs បាន”។ បើដូចការរំពឹងទុករបស់ Cleggs នោះ Ronaldo នឹងចូលនិវត្តនៅកំឡុងឆ្នាំ ២០២៦។
រំឭកថា អតីតខ្សែបម្រើខាងលើបានចាយពេល ២៣ រដូវកាលក្នុងអាជីពបាល់ទាត់ នាមជាកីឡាករនៅក្លឹបបិសាចក្រហម ហើយប្រកាសចូលនិវត្តនៅឆ្នាំ ២០១៤ ក្នុងពេលមានអាយុ ៤០ ឆ្នាំ និងបច្ចុប្បន្នកំពុងដើរតួជាអ្នកចាត់ការក្រុមជម្រើសជាតិវែល៕
ប្រភព៖ SportBible