• អ្នក​ប្រដាល់​សង្ឃ​សៅ​លីង Yi Long ដែល​ធ្លាប់​យក​ឈ្នះ​ប៊ូខាវ​ មាន​ប្រវត្តិ​បែប​ណា​ខ្លះ?

    នៅ​លើ​សង្វៀន​ក្នុង​ប្រទេស​ចិន​កាល​ពី​ឆ្នាំ ២០១៥ និង ២០១៦ អ្នក​ប្រដាល់​មួយ​ថៃ​ប៊ូខាវ ធ្លាប់​បើក​ការ​តតាំង​ចំនួន ២ លើក ត​ទល់​អ្នក​ប្រដាល់​ក្បាច់គុណ​ល្បី​ឈ្មោះ​របស់​ប្រទេស​ចិន ​ដែល​មាន​រហស្សនាម សង្ឃ​សៅ​លីង Yi Long។ ការ​ប្រកួត​ ២ លើក​នោះ Yi Long បាន​យក​ឈ្នះ ១ និង​ចាញ់ ១ ​តាម​រយៈ​ការ​កាត់សេចក្ដី​ដោយ​ពិន្ទុ​ដូច​គ្នា។

    ផ្សា​ភ្ជាប់​នឹង​រឿងរ៉ាវ​នេះ​ក៏​ជឿ​ថា មាន​អ្នក​គាំទ្រ​វិស័យ​ប្រដាល់​ជា​ច្រើន​ប្រាកដ​ជា​ចង់​ដឹង​ច្បាស់​នូវ​ប្រវត្តិ​ខ្លះៗ​របស់​សង្ឃ​សៅ​លីង​ខាង​លើ ថា​តើ​លោក​មាន​បទពិសោធន៍​ហ្វឹកហាត់ និង​ឆ្លងកាត់​ការ​ប្រកួត​បែប​ណា​ខ្លះ?

    Yi Long មាន​ឈ្មោះ​ពិត Liu Xingjun ​ឬ​ជាប់​រហស្សនាម​ថា “One Dragon”។ លោក​កើត​នៅ​ថ្ងៃ​ទី ១ ​មេសា ឆ្នាំ ១៩៨៧ ក្នុង​ខេត្ត Shangdong ប្រទេស​ចិន ហើយ​មាន​កម្ពស់ ១,៧៦ ម៉ែត្រ ​និង​ទម្ងន់ ៧៣,៥ គីឡូក្រាម។

    បុរស​វ័យ ៣៥ ឆ្នាំ​រូប​នេះ​ត្រូវ​បាន​គេ​ស្គាល់​ថា​ជា​មនុស្ស​ស្រលាញ់​ក្បាច់គុន​បុរាណ​ចិន​ខ្លាំង​បំផុត ហើយ​លោក​បាន​ចាប់​ផ្តើម​ហ្វឹកហាត់​តាំង​ពី​អាយុ ១៤ ឆ្នាំ ​និង​ដាក់​គោលដៅ​ចង់​ក្លាយ​ជា​អ្នក​ប្រដាល់​ក្បាច់​គុណ ក្រោយ​ទទួល​បាន​ការ​ណែនាំ​ពី​ឪពុក​ជុំវិញ​ក្បាច់​គុណ​របស់​ប្រទេស​ចិន។

    កំឡុង​ពេល​ហ្វឹកហាត់ លោក​បាន​ចាប់​យក​ការ​រៀនសូត្រ​ក្បាច់គុន​ចម្រុះ​ផ្សេងៗ​ពី​គ្នា​មាន​ដូច​ជា សៅលីង​កុងហ្វូ (Shaolin Kung Fu) វីងជុន (Wing Chun) សាន់ដា (Sanda) និង​មួយថៃ (Muay Thai)។ រហូតដល់​ឆ្នាំ ២០០៩ Yi Long បាន​ប្រលូក​ក្នុង​កម្មវិធី​ប្រកួត​ក្បាច់​គុណ​ Wu Lin Feng របស់​ប្រទេស​ចិន និង​កម្មវិធី​លើ​ឆាក​អន្តរជាតិ​ផ្សេងៗ​ជា​ច្រើន​ទៀត ដោយ​សរុប​មក​ទល់​ពេល​នេះ​លោក​ចូលរួម​ចំនួន ៧៤ លើក ឈ្នះ ៦១ លើក ចាញ់ ១២ លើក ស្មើ ១ លើក ធ្លាប់​ផ្តួល​គូ​ប្រកួត​ឲ្យ​សន្លប់ ២៣ លើក។

    សំណួរ​មួយ​ដែល​មិន​ទាន់​មាន​អ្នក​ឆ្លើយ​ចេញ ហើយ​ក៏​មិន​ទាន់​មាន​ការ​បញ្ជាក់​ច្បាស់​ពី​សាមី​ខ្លួន​ នោះ​គឺ​ត្រង់​ថា តើ Yi Long ​ជា​សង្ឃ​សៅលីង​ពិត​ប្រាកដ​ ឬ​គ្រាន់​តែ​ជា​បុគ្គល​ដែល​ធ្លាប់​ទៅ​ហ្វឹកហាត់​​ក្បាច់​គុណ​នៅ​វត្ត​សៅ​លីង? ដោយ​ត្រឹម​ដឹង​ថា ​ជា​ទូទៅ​រៀងរាល់​ការ​ប្រកួត លោក​រមែង​ស្លៀកខោពណ៌​លឿង អម​នឹង​ម៉ូត​សក់​ត្រងោល ដែល​ជា​អត្តសញ្ញាណ​បង្ហាញ​ឲ្យ​អ្នក​គាំទ្រ​នឹក​ដល់​សង្ឃ​សៅលីង​ពិតៗ។

    ចំពោះ​ជោគជ័យ​ពាន​រង្វាន់​និង​ខ្សែ​ក្រវាត់​ដែល​លោក​ធ្លាប់​បាន​សម្រេច​កន្លង​មក​មាន​ដូច​ជា៖

    • CIK World Champion ឆ្នាំ ២០១២
    • Wu Lin Feng World champion ឆ្នាំ ២០១៣ និង ២០១៤
    • WCK World Champion ឆ្នាំ ២០១៥
    •  S-1 Muaythai Super Middleweight World champion ឆ្នាំ ២០១៤

    ប្រភព៖ yokkao | wikipedia

     

     

    ភ្ជាប់ទំនាក់ទំនងជាមួយ CTS SPORT