ក្រោយពីទិញខ្សែការពារណាក៏ពិបាកដែរនោះ ពេលនេះក្រុម Manchester United បានងាកទៅមើលខ្សែការពារ Kurt Zouma របស់ក្លឹប Chelsea វិញហើយ ដើម្បីទិញឱ្យបានមុនបិទរដូវកាលដោះដូរកីឡាករ។
បច្ចុប្បន្ននេះ ក្រុមបិសាចក្រហមកំពុងប្រជែងជាមួយ Everton ដើម្បីទិញយក Yerry Mina ពីក្លឹប FC Barcelona ។ យ៉ាងណាមិញ ទន្ទឹមនឹងការប្រដេញយកកីឡាករកូឡ៊ុំបីនេះដែរ បិសាចក្រហមក៏បានត្រៀមកីឡាករម្នាក់ទៀតដែរ គឺ Zouma របស់ក្រុម Chelsea ។ លោក Jose Mourinho ចង់យកអតីតកូនក្រុមរបស់ខ្លួននេះមកលេងវិញ ក្រោយពីខ្សែការពារដែលលោកចង់បានជាច្រើននាក់ បែរជាទិញយកមិនបាននោះ។
អ្នកចាត់ការខាងលើបាននិយាយថា៖ “ពីដើមមក ខ្ញុំចង់បានកីឡាករបន្ថែម២នាក់ទៀត ប៉ុន្តែពេលនេះខ្ញុំគិតថាមិនអាចបាន២នោះទេ។ ខ្ញុំចង់បានត្រឹមតែម្នាក់ប៉ុណ្ណោះ ប្រសិនបើអាចទៅរួច។ ១ខែមុន ខ្ញុំបានឱ្យឈ្មោះកីឡាករ៥នាក់ទៅថ្នាក់លើដើម្បីទិញយក ប៉ុន្តែមកដល់ពេលនេះមិនទាន់បានម្នាក់ទេ។ ខ្ញុំសង្ឃឹមថាបានតែម្នាក់គឺគ្រប់គ្រាន់ហើយនៅពេលនេះ”។
Zouma ជាខ្សែការពារចូលរួមជាមួយ Chelsea នៅឆ្នាំ២០១៤ ហើយក៏ត្រូវក្លឹបដាក់ឱ្យ Stoke City ខ្ចីជើងនៅរដូវកាលមុន។ កីឡាករវ័យ២៣ឆ្នាំរូបនេះ ក៏ធ្លាប់ជាប់ជាជម្រើសជាតិបារាំងផងដែរ តាំងពីថ្នាលយុវជនមកម្ល៉េះ៕ប្រភព៖ DailyMail