សហព័ន្ធកីឡាជាតិនានា ដែលគ្រោងនឹងរៀបចំការប្រកួតជ្រើសរើសជើងឯកថ្នាក់ជាតិ ចន្លោះពីថ្ងៃទី១០ ដល់ដំណាច់ខែវិច្ឆិកា បានប្រកាសផ្អាកការប្រកួតជាបន្តបន្ទាប់ ដើម្បីបន្តចូលរួមទប់ស្កាត់ការរីករាលដាលនៃជំងឺកូវីដ-១៩ របស់ក្រសួងសុខាភិបាល និងការណែនាំរបស់ក្រសួងអប់រំ ជាពិសេសគឺចូលរួមបញ្ចប់ព្រឹត្តិការណ៍៣វិច្ឆិកា។
ក្រៅពីការផ្អាកបណ្តោះអាសន្ននៃប្រកួតកីឡាបាល់ទាត់គ្រប់កម្រិតយុវជន លីគទី២ លីគនារី បាល់ទាត់ក្នុងសាល ប្រដាល់គុនខ្មែរ អត្តពលកម្ម គេសង្គេតឃើញសហព័ន្ធកីឡាជាតិផ្សេងទៀត ក៏បានប្រកាសផ្អាកសកម្មភាពប្រកួតបណ្តោះអាសន្នជាបន្តបន្ទាប់ ដូចជាជើងឯកថ្នាក់ជាតិ កីឡាបាញ់កាំភ្លើង លើកទៅខែធ្នូ, កីឡារំារង់ចាំជូនដំណឹងជាថ្មី, ការរៀបចំទិវា គុណតម្លៃអូឡាំពិក នៅភ្នំពេញ និងមួយចំនួន។ ក្នុងពេលដំណាលគ្នានេះ សកម្មភាពកីឡាមួយចំនួនក៏ត្រូវលើកពេលដូចគ្នា ដូចជាកិច្ចប្រជុំប្រចាំសប្តាហ៍របស់ CAMSOC, ការហ្វឹកហាត់ ការលេងកីឡាលក្ខណៈប្រមូលផ្តុំ, ពហុកីឡដ្ឋានជាតិអូឡាំពិកត្រូវផ្អាកការចេញចូលជាបណ្តោះអាសន្ន។
កាលពីថ្ងៃទី០៨ ខែវិច្ឆិកា ឆ្នាំ២០២០ ក្រសួងអប់រំ យុវជន និងកីឡាបានចេញសេចក្តីប្រកាសព័ត៌មានមួយ ដោយសម្រេចផ្អាកគ្រប់សកម្មភាពនៃការលេងកីឡា និងហាត់ប្រាណនៅតាមទីសាធារណៈ និងបិទមិនឱ្យមានការចេញចូលពហុកីឡដ្ឋានជាតិបណ្តោះអាសន្ន។ ការផ្អាកនេះធ្វើឡើងក្រោយក្រសួងរកឃើញថា អង្គរក្សដែលឆ្លងជំងឺកូវីដ-១៩ បានទាក់ទងការងារផ្ទាល់ និងប្រយោលជាមួយមនុស្ស៧រូប ដែលធ្វើការក្នុងវិស័យកីឡា។ រដ្ឋមន្ត្រីក្រសួងអប់រំ យុវជន និងកីឡាបានបញ្ជាក់ថា អង្គរក្ស១រូបដែលឆ្លងជំងឺកូវីដ-១៩ និងជាគ្រូបង្វឹកបានមកបង្ហាត់កីឡាករ២នាក់នៅក្នុងបរិវេណពហុកីឡដ្ឋានជាតិអូឡាំពិក និងបានទាក់ទងការងារផ្ទាល់ និងដោយប្រយោលជាមួយបុគ្គលិក៥រូប នៃមជ្ឈមណ្ឌលជាតិហ្វឹកហ្វឺនកីឡា៕