Glen Johnson អតីតកីឡាករជើងចាស់ ថ្មីៗនេះបានបង្ហាញការយល់ឃើញថា ខ្សែការពារស្លាបរបស់ក្លឹបតោខៀវ Chelsea គឺកីឡាករ Reece James មានគុណភាពលេងនៅតំណែងការពារ ល្អជាងកីឡាកររបស់ Liverpool គឺ Trent Alexander-Arnold។
Arnold អាយុ ២២ ឆ្នាំ ជាការពិតកំពុងជាប់ឈ្មោះជាខ្សែការពារស្លាបស្តាំដ៏ល្អបំផុតមួយក្នុងលោក ក្រោយពីបានជួយឲ្យ Liverpool ឈ្នះពាន UCL និង PL នៅរយៈពេល ២ ឆ្នាំចុងក្រោយ។
យ៉ាងណាមិញ Johnson អតីតកីឡាករហង្សបានប្រាប់ Compare.bet ថា៖ “តាមពិតការប្រៀបធៀបរវាង Trent និង Reece James ពេលខ្លះគឺវាស៊ីសងលើគូប្រជែងដែលពួកគេត្រូវតតាំងដែរ តែសម្រាប់ខ្ញុំនៅតែគិតថា Reece James គេល្អជាង ព្រោះគេលឿន និងរឹងមាំជាង”។
លោកបន្ថែម៖ “Trent គេឆ្លាត ហើយអាចគ្រប់គ្រងបាល់បានល្អ ពោលគឺល្អជាងអាយុគេឆ្ងាយណាស់ តែសម្រាប់ Reece ខ្ញុំគិតថា លេងទប់ខាងក្រោយបានល្អច្រើនជាង”៕
ប្រភព៖ SportBible