លោក Carlo Ancelotti បានអះអាងថាខ្សែប្រយុទ្ធ Zlatan Ibrahimovic មានទម្រង់លេងអមតៈដូច Cristiano Ronaldo អីចឹងដែរ។
Zlatan វ័យ៣៩ឆ្នាំ កំពុងឈរនៅកំពូលតារាងរកគ្រាប់បាល់បានច្រើនជាងគេនៅ Serie A ខណៈដែល Ronaldo វ័យ៣៥ឆ្នាំកំពុងឈរនៅលេខរៀងទី២។ កីឡាករទាំងពីរនាក់នេះ វ័យជ្រេណាស់ទៅហើយ ប៉ុន្តែបើនិយាយពីទម្រង់លេងវិញគឺនៅល្អដូចដើម ហើយឱកាសស្វែងរកគ្រាប់បាល់វិញសឹងតែមានគ្រប់ប្រកួតទៅហើយ។
ដោយមើលឃើញបែបនេះហើយ ទើបបានជាលោក Ancelotti អ្នកចាត់ការកំពុងដឹកនាំក្រុម Everton និយាយថា៖ “ពេល Zlatan ទៅលេងនៅអាមេរិក ខ្ញុំគិតថាពេលចុងក្រោយរបស់គេហើយ។ តែជាក់ស្ដែងនៅទីនោះគាត់រកគ្រាប់បាល់បានយ៉ាងច្រើន ហើយក៏ត្រលប់មកអ៊ីតាលីវិញ។ នៅទីនេះ ខ្ញុំក៏គិតថាជាពេលដើម្បីលាគាត់ដែរ តែគាត់នៅបន្ដរកគ្រាប់បាល់បានសឹងគ្រប់ចុងសប្ដាហ៍។ គាត់ជាអមតៈ ដូច Cristiano Ronaldo អីចឹង។ ការបន្ដលេងគឺងាយស្រួល ប៉ុន្តែពួកគេមិនត្រឹមតែលេងទេ ពួកគេតែងតែចង់បានគ្រាប់បាល់ជានិច្ច”៕ប្រភព Goal
