Lionel Messi ត្រូវបានគេរាយការណ៍ថា នឹងមិនតក់ក្រហល់ក្នុងការសម្រេចចិត្តរឿងបន្តកុងត្រាថ្មីឬចាកចេញអ្វីនោះទេ ពោលគឺស៊ីសងចាំអុតមើលអ្នកត្រូវឡើងកាន់តំណែងជាប្រធានក្លឹបថ្មីសិន។
បច្ចុប្បន្នក្លឹប Barcelona កំពុងទំនេរកៅអីប្រធានក្លឹប បន្ទាប់ពីអតីតប្រធានក្លឹបចាស់លោក Josep Maria Bartomeu បានប្រកាសលាលែងពីតំណែងកាលពីខែតុលាកន្លងទៅ។
តាមរបាយការណ៍ពី Marca បានចុះផ្សាយថា ម្ចាស់ពាន Ballon d’Or ៦ សម័យកាល នឹងមិនទាន់គិតគូរដល់អនាគតរបស់ខ្លួននោះទេ ពោលរង់ចាំដល់ប្រធានក្លឹបថ្មីចូលកាន់តំណែងសិន ហើយចង់ដឹងឲ្យច្បាស់ពីគោលនយោបាយថ្មីរបស់ក្លឹប មុនលោកសម្រេចចិត្តលើរឿងដ៏សំខាន់នេះ។
បញ្ជាក់ថា កុងត្រារបស់ខ្សែប្រយុទ្ធវ័យ ៣៣ ឆ្នាំ គឺសល់សុពលភាពដល់ចុងខែមិថុនា ឆ្នាំ ២០២១ ប្រសិនណាលោកបន្តកុងត្រាថ្មីទៀតនោះ មានន័យថាលោកប្រហែលសម្រេចចូលនិវត្តនៅ Camp Nou ហើយ តែប្រសិនចាកចេញជម្រើសទៅ Man City គឺមានភាគរយខ្ពស់បំផុត៕
ប្រភព៖ Sportsmole