ក្រៅពីឈុតទី ១ ពណ៌ស ឈុតទី ២ ពណ៌រាងក្រមៅ ក្លឹប Real Madrid ក៏មានឈុតទី ៣ មួយផ្សេងទៀតដែលប្រើប្រាស់ពណ៌ផ្កាឈូកស្រស់។ ឈុតថ្មីទី ៣ ដែលទើបរចនាដាក់ឲ្យប្រើប្រាស់បានរយៈពេលជាង ១ ឆ្នាំ គឺពុំបានពាំនាំនូវភាពជោគជ័យជូនក្លឹបនោះឡើយ ផ្ទុយទៅវិញមានតែភាពបរាជ័យ ហើយចាញ់ស្ពឹកមុខរៀងរាល់ប្រកួត។
តទៅនេះ ទំព័រ CTS Sports សូមធ្វើការរំឭក ៣ លើកដែលក្លឹប Real Madrid បានប្រើប្រាស់ឈុតពណ៌ផ្កាឈូក ហើយទទួលលទ្ធផលចាញ់ទាំង ៣ លើក៖
១) ធ្លាក់ក្រោមថ្វីជើងរបស់ Man City នៅ UCL
កាលពីជើងទី ២ វគ្គ ១៦ ក្រុមចុងក្រោយ នៅកំឡុងខែសីហា ឆ្នាំ ២០២០ ក្លឹប Real Madrid បានបើកឆាកប្រើប្រាស់ឈុតពណ៌ផ្កាឈូកនោះជាលើកដំបូង ហើយក៏ជាថ្ងៃតែមួយដែលក្រុមការពារជើងឯក UCL ១៣ សម័យកាល ត្រូវហាលអាវត្រឹមវគ្គ ១៦ ក្រុមផងដែរ។
Man City បានយកឈ្នះ ២-១ ទៅលើ Real Madrid និងសរុបលទ្ធផលពីរជើងគឺ ៤-២ បន្តក្តីសង្ឃឹមឆ្ពោះទៅកាន់វគ្គបន្ទាប់។
២) ចាញ់ក្រុមទើបប្រម៉ូតឡើង Cadiz នៅ LaLiga
រំលងបានជាង ២ ខែបន្ទាប់ ក្លឹប Real Madrid ត្រូវបើកកីឡដ្ឋាន Estadio Alfredo Di Stefano ស្វាគមន៍ក្លឹប Cadiz ដែលទើបតែប្រម៉ូតឡើង មកក្នុងក្របខ័ណ្ឌ LaLiga ហើយមុនការប្រកួតនរណាក៏រំពឹងដែរថា ស្តេចសនឹងស៊ីផុយទល់ Cadiz តែមានឯណា ក្រោយចប់ការប្រកួតលទ្ធផលម្ចាស់ដីបែរជាចាញ់ក្រុមភ្ញៀវ ០-១ ធ្វើឲ្យ Real រងភាពអាម៉ាស់ជាខ្លាំង។
៣) ចាញ់ Valencia ៤-១ នៅ LaLiga
វាជាបរាជ័យកាលពីយប់មិញ ដែល Real Madrid ធ្វើមិនបានល្អទាល់តែសោះ ហើយ ៤ គ្រាប់នោះមាន ៣ ជាការបង្កកំហុសរបស់កីឡាករ Madridក្នុងប្រអប់គ្រោះថ្នាក់ ហើយ ១ ទៀតជាបាល់ Own Goal កើតចេញពី Raphael Varane។
មើលតាមស្ថិតិនៃការលេង Real ដូចជាមានឱកាសច្រើនដែរ ដោយស៊ុតចេញ ១៦ លើកចំគោលដៅ ៦ លើក តែយកបានត្រឹម ១ គ្រាប់គត់ ខណៈម្ចាស់ផ្ទះ Valencia បើដកបាល់ប៉េណាល់ទីស៊ុតចំគោលដៅ ១ លើកគត់ តែចុងក្រោយពួកគេនៅតែឈ្នះ។
តើ Real Madrid ជាមួយឈុតពណ៌ផ្កាឈូកនោះ ឡាក់ឆុងគ្នាឬបែបណា បានឲ្យតែពាក់ចេះតែចាញ់បែបហ្នឹង?