ក្លឹប Paris Saint-Germain ដែលដឹកនាំដោយអ្នកចាត់ការលោក Thomas Tuchel ត្រូវបានគេរាយការណ៍ថា ត្រៀមនឹងនាំយកយុវជនថ្នាលអាយុ ១៥ ឆ្នាំមួយរូបមានឈ្មោះ El Chadaille Bitshiabu ឲ្យមកចូលរួមនៅឈុតធំក្នុងពេលដ៏ខ្លីខាងមុខ។
គេជាកីឡាករលេងនៅតំណែងខ្សែការពារកណ្តាល ដែលក្រៅពីភាពប៉ិនប្រសព្វ សម្រាប់ចំណុចលេចធ្លោរបស់គេគឺត្រង់ផ្នែកកាយសម្បទាដែលអំណោយទានពីធម្មជាតិ នោះគឺកម្ពស់ខ្ពស់ដល់ទៅ ១,៩៦ ម៉ែត្រ ហើយទម្ងន់ ៩៦ គីឡូក្រាម។
កីឡាករសញ្ជាតិបារាំងខាងលើ បានបង្ហាញខ្លួនឲ្យឈុត U19 នៅរដូវក្តៅឆ្នាំ ២០២០ នេះ ហើយដោយសារនៅឈុតធំ មានសិស្សច្បងជួបបញ្ហារបួសច្រើន និងការប្រកួតកំពុងមមាញឹកផងនោះ ទើបលោក Tuchel សម្រេចចង់ផ្តល់ឱកាសឲ្យគេតែម្តងទៅ ព្រោះណាមួយត្បិតបើអាយុគេតិច តែគេមានទេពកោសល្យ និងរូបរាងកាយមិនចាញ់យុវជនស្រករ ២០ ឡើយ។
បញ្ជាក់ថា នៅពេលដែល Bitshiabu អាចបង្ហាញខ្លួនលើកដំបូងនៅឈុតធំឲ្យក្លឹបសេដ្ឋីបារាំង នោះគេនឹងជាប់ឈ្មោះក្នុងកំណត់ត្រាប្រវត្តិសាស្ត្រក្លឹប នាមកីឡាករបង្ហាញខ្លួននៅអាយុតិចបំផុត ដែលជំនួសឈ្មោះអ្នកគ្រងបច្ចុប្បន្នគឺ Kingsley Coman ដែលធ្លាប់ចូលរួមលេងឲ្យ PSG នៅអាយុ ១៦ ឆ្នាំ ៨ ខែ និង ៤ ថ្ងៃ កាលពីរយៈពេល ៧ ឆ្នាំមុន៕
ប្រភព៖ SportBible