អតីតអ្នកប្រដាល់ក្បាច់គុណចម្រុះ ConorMcGregor បានឆ្លើយតបទៅកាន់អ្នកគាំទ្រលើបណ្តាញសង្គម ថាក្នុងរយៈពេល ៣ ឆ្នាំទៅមុខទៀត លោកនឹងក្លាយជាសេដ្ឋីប្រាក់ពាន់លានដុល្លារដូចអត្តពលិកកំពូល ៥ រូបឯទៀតដែរ។
បុរសវ័យ ៣២ ឆ្នាំ សព្វថ្ងៃមានទ្រព្យសម្បត្តិជាង ១៣០ លានដុល្លារ ដោយនេះរាប់តែទ្រព្យដែលទទួលបានពីអាជីពលើសង្វៀន UFC និងប្រាក់ទទួលបានពីកិច្ចព្រមព្រៀងផ្សព្វផ្សាយឲ្យក្រុមហ៊ុន Burger King, Beats, Monster Energy និង Reebok តែប៉ុណ្ណោះ ប៉ុន្តែមិនទាន់រាប់បញ្ចូលនូវចំណូលនៅអាជីវកម្មលក់ស្រាវ៊ីស្គីរបស់លោកនោះឡើយ ដោយត្រឹមមួយឆ្នាំដំបូងលោកកើបបានជាង ៩០០ លានដុល្លារទៅហើយពីក្រុមហ៊ុននោះ។ (បញ្ជាក់៖ ជាទំហំចំណូលមិនទាន់ដកថ្លៃដើម ឬគិតចេញជាប្រាក់ចំណេញ)
ផ្សាភ្ជាប់នឹងភាពជោគជ័យនៃអាជីវកម្មខាងលើ បុរសសញ្ជាតិអៀរឡង់បានបង្ហើបប្រាប់អ្នកគាំទ្រលើបណ្ដាញសង្គម Twitter ថាត្រឹមអាយុ ៣៥ ឆ្នាំ គឺលោកនឹងអាចក្លាយជាសេដ្ឋីមានប្រាក់ពាន់លានដុល្លារបានហើយ។
ប្រសិនក្លាយជាការពិតមែននោះ McGregor នឹងចារឈ្មោះក្នុងបញ្ជី ជាមួយអត្តពលិកឯទៀតមានដូចជាអ្នកប្រដាល់មិនដែលចាញ់ Floyd Mayweather តារាបាល់បោះ Michael Jordan អ្នកវាយកូនហ្គោល Tiger Woods និងតារាបាល់ទាត់ Cristiano Ronaldo ក៏ដូចជា Lionel Messi៕
ប្រភព៖ TalkSports