ក្នុងជ័យជម្នះលើក្រុម Real Betis ដល់ទៅ ៥-២ នៅយប់មិញនេះ ក្រុម FC Barcelona បានបាត់បង់ខ្សែប្រយុទ្ធម្នាក់ទៅហើយ គឺ Ansu Fati ដែលរងរបួសជង្គង់ធ្ងន់ធ្ងរ។
ក្នុងការប្រកួតនេះ Fati បានប៉ះទង្គិចគ្នាជាមួយ Aissa Mandi ខ្សែការពារ Real Betis ក្នុងតំបន់គ្រោះថ្នាក់ ហើយក្រុម Barcelona ក៏ទទួលបានបាល់ប៉េណាល់ទីនេះដែរ តែ Griezmann ស៊ុតមិនសម្រេច។ កីឡាករវ័យក្មេងរូបនេះត្រូវប្ដូរចេញនៅតង់ទី២ ហើយក្រុមគ្រូពេទ្យពិនិត្យឃើញថាជង្គង់របស់គេនេះ បានប៉ះពាល់ខ្លាំងមែនទែន។ គេមិនទាន់ប្រាកដទេថានឹងត្រូវសម្រាកប៉ុន្មានខែ ប៉ុន្តែច្បាស់ណាស់គឺពិតជាធ្ងន់ធ្ងរ។
Fati កំពុងឡើងជើងខ្លាំងមែនទែនទាំងនៅក្រុម Barcelona និងក្រុមជម្រើសជាតិអេស្ប៉ាញ។ កីឡាករវ័យ១៨ឆ្នាំនេះក៏មានឈ្មោះលេងក្នុងការប្រកួតនៅជម្រើសជាតិខាងមុខដែរ ប៉ុន្តែបញ្ហារបួសនេះនឹងធ្វើឱ្យខកខានឱកាសមិនខាន៕ប្រភព Marca
