ក្លឹប​យក្ស​អេស្ប៉ាញ Real Madrid ត្រូវ​បាន​គេ​រាយការណ៍​ថា អាច​នឹង​បាត់បង់​កីឡាករ​សំខាន់ ២ រូប នៅ​កំឡុង​ទីផ្សារ​ដោះដូរ​រដូវ​រងា ខែ​មករា ឆ្នាំ ២០២១ ខាង​មុខ។ នោះ​គឺ​ Luka Jovic និង Isco ដែល​សុទ្ធ​តែ​កីឡាករ​ស្ថិត​ក្រៅ​ជម្រើស​របស់​អ្នកចាត់ការ​លោក Zinedine Zidane។

សម្រាប់ Isco តាម​ដំណឹង​ល្ហៀងៗ ថា​ចង់​ផ្ទេរ​ទៅ​ Everton ដើរ​តាម​គន្លង​របស់​មិត្ត​ចាស់ James Rodriguez ប៉ុន្តែ​ផ្ទេរ​ត្រឹម​លក្ខខណ្ឌ​ខ្ចី​ជើង ដើម្បី​ចាំ​មើល​ស្ថានភាព​នៅ​បញ្ចប់​រដូវ​កាល​សិន។ យ៉ាងណាមិញ​លោក Carlo Ancelotti ក៏​បង្ហើប កាល​ពី​ថ្ងៃ​មុន​ដែរ​ថា Isco ជា​កីឡាករ​ល្អ​និង​មាន​អនុស្សាវរីយ៍​ច្រើន​ជាមួយ​លោក តែ​រឿង​ចង់​យក​មក​ក្លឹប​ Everton ឬ​អត់ លោក​មិន​ទាន់​និយាយ​នោះ​ទេ។

ដោយឡែក​សម្រាប់ Jovic ដែល​ធ្លាក់​ទម្រង់​លេង​នៅ​រយៈ​ពេល​ចុង​ក្រោយ ទទួល​បាន​ការ​ចាប់​អារម្មណ៍​ពី​សំណាក់​ក្លឹប​នៅ​អ៊ីតាលី រួម​មាន AC Milaនិង Napoli។ កីឡាករ​ស៊ែប៊ី​ត្រូវ​បាន Real ទិញ​យក​មក​ក្នុង​តម្លៃ ៥២,៤ លាន​ផោន ហើយ​ទើប​រក​បាន ២ គ្រាប់​ប៉ុណ្ណោះ នៅ ៣១ ប្រកួត​ជាមួយ Los Blancos៕

ប្រភព៖ Sportskeeda