ក្រុមបាល់ទាត់ Cambodian Fan Club All Stars ឬហៅកាត់ CFA ថ្មីៗនេះទើបតែប្រកាសដំណឹងល្អមួយ ជុំវិញការមកដល់នូវសមាជិកថ្មីដែលជាតារាចម្រៀងល្បីឈ្មោះប្រចាំផលិតកម្ម Town រួមមានលោក ម៉ៅ ហាជី និង ដា ភ្លេង។
តារាចម្រៀងទាំងពីររូបខាងលើ នឹងចូលរួមជាកីឡាករកិត្តិយសនូវគ្រប់សកម្មភាពរបស់ក្រុមបាល់ទាត់ CFA និងជាពិសេសគឺកម្មវិធីតន្ត្រី ក៏ដូចជាការប្រកួតបាល់ទាត់សប្បុរសធម៌តាមបណ្តាខេត្ត/ក្រុងនានា ដើម្បីជួយដល់ជនខ្វះខាត។
បើតាមការបង្ហើបពីអ្នកតំណាងក្រុម CFA លោក អៃ សំអូន បានឲ្យដឹងថា៖ “គម្រោងការងារសប្បុរសធម៌នាពេលបន្ទាប់ គ្រោងធ្វើឡើងនៅខេត្តកោះកុង និងខេត្តសៀមរាបនៅពេលដ៏ខ្លីខាងមុខ ហើយក៏នឹងមានវត្តមានសិល្បករទាំងពីររូបខាងលើចូលរួមផងដែរ”។
បញ្ជាក់ដែរថា លោក ម៉ៅ ហាជី បានទទួលចំណាត់ថ្នាក់លេខ ២ ក្នុងកម្មវិធីលំដាប់ពិភពលោក Cambodian Idol រដូវកាលទី ១ ហើយកន្លងមកទទួលបានការគាំទ្រខ្លាំងពីមហាជនតាមរយៈការ Cover បទ “ស្ទឹងសម្ងាត់” និង “រំដួលដងស្ទឹងសង្កែ” ដែលមានការចុចទស្សនាខ្ទង់លានដងលើប្រព័ន្ធ YouTube។
រីឯ ដា ភ្លេង ដែលជាម្ចាស់បទ “នឹកនា” និង “អារម្មណ៍សល់” មានបង្កប់អត្ថន័យចាក់ចំបេះដូងយុវវ័យ ក៏ផ្ទុះការចាប់អារម្មណ៍ខ្លាំងផងដែរ ហើយនៅពេលឆាប់ៗខាងមុខនេះលោកបានបង្ហើបថា គ្រោងនឹងត្រៀមចេញបទថ្មីមួយទៀតគឺ “ស្រាជាមិត្ត”៕