Cristiano Ronaldo មានកូនក្នុងបន្ទុកចំនួន ៤ នាក់ ហើយក្នុងចំណោមនោះមានតែម្នាក់ប៉ុណ្ណោះ ដែលស្គាល់ច្បាស់ពីអត្តសញ្ញាណនៃម្តាយបង្កើតរបស់គេ នោះគឺកូនស្រីតូចមានអាយុ ២ ឆ្នាំឈ្មោះ Alana Martina dos Santos Aveiro ដែលជាកូនបង្កើតមិត្តស្រីបច្ចុប្បន្ន Georgina Rodriguez។
ដោយឡែកកូនច្បង Cristiano Ronaldo Jr ដែលមានអាយុ ១០ ឆ្នាំ និងកូនភ្លោះ ២ រូបឯទៀតរួមមាន Eva Maria Dos Santos និង Mateo Ronaldo ដែលមានអាយុ ៣ ឆ្នាំ គឺមិនមាននរណាដឹងពីអត្តសញ្ញាណច្បាស់លាស់នៃម្តាយរបស់ពួកគេនោះឡើយ។
ដើម្បីឆ្លើយតបទៅនឹងសំណួរនៃការចង់ដឹងពីអ្នកគាំទ្ររបស់ Ronaldo ទំព័រ CTS Sports សូមធ្វើការសង្ខេបនូវព័ត៌មានខ្លះៗដែលពាក់ព័ន្ធនឹងម្តាយបង្កើតរបស់កូនច្បង Jr ហើយពីពេលវេលាច្បាស់លាស់ដែល CR7 នឹងធ្វើការប្រកាសពីអត្តសញ្ញាណពិត។
តាមពិតទៅនេះជារឿងចាស់ដែលផ្ទុះឡើងយូរណាស់មកហើយ ដោយតាមរបាយការណ៍ក្រៅស្រុកជាច្រើនចុះផ្សាយថាកាលពីជាង ១០ ឆ្នាំមុន Ronaldo បានជ្រុលជ្រួសជាមួយនិស្សិតស្រីអាយុ ២០ ឆ្នាំមួយរូប នៅឯទីក្រុង Manchester ចក្រភពអង់គ្លេស។ ក្រោយឆ្លងកាត់យប់ដ៏មានន័យនោះហើយ នាងបានពិនិត្យឃើញថាមានផ្ទៃពោះ ហើយធ្វើតេស្ត DNA ក៏រកឃើញថាជាកូនរបស់ Ronaldo ពេលនោះ CR7 មិនបដិសេធនោះទេ ដោយព្រមទទួលយក ព្រោះជាកូនដំបូងរបស់លោក តែទាមទារឲ្យនាងធ្វើការលាក់អត្តសញ្ញាណ។
ដើម្បីជាថ្នូរដោះដូរ កីឡាករព័រទុយហ្គាល់បានចំណាយទឹកប្រាក់ជិត ១៣ លានដុល្លារអាមេរិក ឲ្យនាងពពោះកូននោះដល់ចាប់កំណើត ហើយនាងត្រូវលាក់អត្តសញ្ញាណរហូតដល់ Jr មានអាយុ ១៨ ឆ្នាំទើប Ronaldo ព្រមប្រាប់ការពិតទាំងអស់ទៅកូនរបស់គេ។
ដូច្នេះមានន័យថា កំឡុងពេលនេះនាងមិនអាចប្រាប់រឿងអាថ៌កំបាំងខាងលើទៅនរណាទាំងអស់ សូម្បីតែគ្រួសាររបស់នាងផ្ទាល់ ហើយក៏មិនអនុញ្ញាតឲ្យទាក់ទងទៅកាន់ Jr នោះដែរ ពោលគឺរឿងអ្វីទាំងអស់អាចត្រឹមឆ្លងកាត់តាមរយៈភ្នាក់ងាររបស់ Ronaldo គឺលោក Mendes តែប៉ុណ្ណោះ ហើយរហូតដល់ឆ្នាំ ២០២៨ ទើបអត្តសញ្ញាណពិតនៃម្តាយរបស់ Jr អាចទម្លាយជាផ្លូវការ។
យ៉ាងណាមិញសម្រាប់ស្រ្តីដែលបិទបាំងអត្តសញ្ញាណនោះ ក៏ត្រូវបានប្រភពជិតស្និទ្ធធ្លាប់ទម្លាយពីស្ថានភាពមួយចំនួនរបស់នាង នៅលើប្រព័ន្ធផ្សព្វផ្សាយបែបនេះថា៖ “នាងតែងតែមមើលហៅឈ្មោះ Ronaldo នៅពេលយប់ ហើយនាងស្រក់ទឹកភ្នែក ពេលគិតដល់រឿងកូនប្រុសបង្កើត ព្រោះដូចបានលក់ព្រលឹងរបស់ខ្លួនទៅឲ្យអ្នកដទៃអ៊ីចឹង បើទោះបីនាងកំពុងរស់នៅលើគំនរទ្រព្យសម្បត្តិ ជីវិតហឺហា តែការពិតនៃរឿងដ៏សំខាន់ក្នុងជីវិត បែរជានាងត្រូវលាក់ទុក មិនអាចប្រាប់សូម្បីតែមិត្តភ័ក្ដិ សូម្បីតែគ្រួសារ ដែលធ្វើឲ្យនាងមានអារម្មណ៍ថាឯកាខ្លាំង”។
ឆ្លើយតបនឹងបញ្ហានេះ ប្រភពជិតស្និទ្ធពីខាង CR7 ក៏បានបង្ហើបដែរថា៖ “ការដោះដូរយកទឹកប្រាក់ជិត ១៣ លានដុល្លារនោះ គឺជាការសម្រេចចិត្តរបស់នាង ហើយនាងក៏បានចុះហត្ថលេខារួចរាល់ហើយដែរ បែបនេះទៅថ្ងៃមុខនាងក៏គ្មានសិទ្ធអាចជួបមុខកូនប្រុសនោះដែរ តែ Ronaldo នៅតែបារម្ភ បារម្ភខ្លាចទំហំទឹកចិត្តដ៏ធំធេងរបស់ម្តាយធ្វើការតវ៉ាទាមទារចង់ជួបកូនបង្កើតរបស់គេនៅថ្ងៃខាងមុខទាល់តែបាន”៕
ប្រភព៖ Quora | Bleacher Report